13-месячнага чыхуахуа па мянушцы Каманда ўзялі на працу ў Нацыянальную гвардыю Мексікі. Пра гэта паведамляе Reuters.

Раней Каманда жыў у пажылой пары. Уладальнікі не маглі даглядаць яго самастойна і вырашылі аддаць гадаванца ваенным у штаце Чыўаўа. У выніку Каманда, рост якога складае ўсяго 21 см, пачалі навучаць пошукава-выратавальнай рабоце ў Нацгвардыі краіны.

На трэніроўках Каманда вучыцца паднімацца па лесвіцах і пераадольваць перашкоды. Спецыяльна для яго вырабілі міні-экіпіроўку: камізэльку, ахоўныя акуляры і шлем з замацаванай на галаве камерай. Па словах лейтэнанта Дэборы Эрнандэс, Каманда разбурае стэрэатып аб тым, што ў Нацгвардыі могуць служыць толькі буйныя сабакі.

Цяпер сабака ўдзельнічае ў афіцыйных цырымоніях, наведвае школы і мерапрыемствы для мясцовых жыхароў. Так, Каманда прыняў удзел у парадзе да Дня незалежнасці Мексікі 16 верасня і стаў героем шматлікіх мемаў у сацсетках.

Усяго ў кіналагічным падраздзяленні Нацгвардыі Мексікі служаць каля 350 сабак, пераважна нямецкія аўчаркі і лабрадоры.