«Мінскметропраект» — аўтар усіх 36 станцый метро ў беларускай сталіцы. Удзельнічаў у праектаванні і будаўніцтве шасці станцый у Маскве. Таксама на рахунку айчынных спецыялістаў дэпо ў Маскве, Баку і Алматы.

На стадыі прапрацоўкі
— Маштабны і складаны праект кальцавой, разлічаны з улікам далёкай перспектывы, знаходзіцца цяпер на стадыі прапрацоўкі, — кажа першы намеснік дырэктара — галоўны інжынер ААТ "Мінскметропраект" Георгій Протасаў. — Плануем размясціць на ёй 16 станцый, прычым шэсць з іх — перасадачныя з першай, з другой і з трэцяй ліній, па дзве на кожную. Колькасць і размяшчэнне будуць яшчэ неаднаразова ўдакладняцца, бо будаўніцтва поўнага кальца зойме нямала гадоў. За гэты час гарадская забудова і транспартная інфраструктура, у якую павінен упісацца метрапалітэн, могуць шмат разоў памяняцца. Сталічныя ўлады паставілі жорсткія тэрміны ўзвядзення першага ўчастка кальцавой лініі. За гэты перыяд трэба будзе вырашыць велізарную колькасць складаных задач, звязаных з узвядзеннем у складаных умовах шчыльнай забудовы Мінска, з пераадоленнем водных перашкод і зон слабых грунтаў, з рэканструкцыяй перасадачных станцый на дзеючых лініях. Прычым дзеючыя ўчасткі ліній падземкі перакрываць нельга. У нашых умовах гэта можа прывесці да транспартнага калапсу. Траса кальцавой у асноўным пройдзе ўздоўж другога транспартнага кальца. Уводзіць у эксплуатацыю новую лінію падземкі хочуць паэтапна. У цяперашні момант на ім прадугледжаны чатыры ўчасткі, паслядоўнасць будаўніцтва якіх прымуць з улікам патрэб горада. Акрамя таго, пры планаванні праекціроўшчыкі павінны ўлічваць стварэнне новых мікрараёнаў. Зараз у сталіцы ўзводзяць ЖК «Паўночны Бераг», а ў перспектыве — «Зялёны Бор».

Першы
Мяркуецца, што першы ўчастак ад станцыі «Парк Дружбы Народаў» у раёне плошчы Бангалор пойдзе ў бок Вяснянкі. Завершыцца на Харкаўскай, на новай станцыі з рабочай назвай «Тучынка». На гэтым адрэзку намечана ўзвядзенне шасці станцый, з якіх дзве перасадачныя, на «Парк Дружбы народаў» і «Пушкінскую». Таксама праекціроўшчыкі прапрацоўваюць варыянт размяшчэння новага электрадэпо на вуліцы Ціміразева — на тэрыторыі, дзе раней знаходзіўся завод ацяпляльнага абсталявання. У гэтым выпадку спатрэбіцца пабудаваць дадатковую ветку і камеру з’ездаў. Калі для абслугоўвання першага ўчастка могуць быць часткова выкарыстаны магутнасці дэпо «Слуцкае» (гэта будзе залежаць ад фактычнага пасажырапатоку), то пры ўводзе другога ўчастка кальцавой без такога аб’екта не абысціся, бо эксплуатавацца будзе вялікая колькасць цягнікоў. Размясціць падобнае збудаванне ў межах сталіцы няпроста. Гэта павінна быць рэжымная тэрыторыя значнай плошчы, якая мае злучэнне з чыгункай. Такіх пляцовак у горадзе няшмат.

Другі
— Далей кальцавая, хутчэй за ўсё, пойдзе ў процілеглым напрамку ад плошчы Бангалор, — адзначае Георгій Протасаў. — На гэтым участку разглядаецца ўзвядзенне пяці станцый. Плануецца перасячэнне з Маскоўскай лініяй на «Акадэміі навук» і з Аўтазаводскай на «Трактарным заводзе» або «Партызанскай». Прапрацаваны некалькі варыянтаў трасы. Пры гэтым улічваліся прагнозныя пасажырапатокі, асвоенасць тэрыторыі, аб’ёмы зносу і перакладкі інжынерных сетак і іншыя ўмовы. Калі станцыя «Парк Дружбы народаў» першапачаткова праектавалася як перасадачная, то новую перасадачную станцыю каля «Акадэміі навук» давядзецца праектаваць і будаваць ва ўмовах шчыльнай гарадской забудовы. Тут праекціроўшчыкам і метрабудаўнікам трэба будзе прымяніць неардынарныя падыходы і нетыпавыя рашэнні.

Трэці і чацвёрты
— Трэці ўчастак плануем ад вуліцы Харкаўскай да жылога комплексу «Мінск-Свет». Мяркуецца ўзвядзенне трох станцый. Чацвёртаму ўчастку кальцавой трэба будзе замкнуць кальцо, злучыўшы перасадку з «Аэрадромнай» на станцыю Аўтазаводскай лініі, — працягвае суразмоўца. — Праектаванне трэцяга і чацвёртага ўчасткаў кальцавой знаходзіцца на пачатковай стадыі, таму траса метро тут можа ўдакладняцца. Планы ўзвядзення чацвёртай лініі павінны быць цесна звязаны з геалогіяй, асвоенасцю тэрыторый, пралягаючымі інжынернымі сеткамі і іншымі ўмовамі. Да таго ж неабходна пастаяннае ўзаемадзеянне вялікай колькасці прадпрыемстваў і арганізацый, якія ўдзельнічаюць ва ўзвядзенні метро. Гэта і праекціроўшчыкі, і заказчыкі, і будаўнікі, і гарадскія службы, і спецыялісты Мінскага метрапалітэна. Як сказаў кіраўнік дзяржавы, не трэба ўзводзіць станцыйныя палацы з архітэктурнымі празмернасцямі. Аднак станцыі павінны быць функцыянальнымі, арыгінальнымі. Не толькі інтэр’еры, але і вялікі аб’ём падземных работ, перакладак інжынерных сетак і іншых спадарожных работ складае кошт узвядзення падземкі, які праекціроўшчыкі імкнуцца мінімізаваць з мэтай скарачэння выдаткаў.