«У нас ёсць вялікая колькасць выдатных мерапрыемстваў, фестываляў, канцэртаў, выстаў, пленэраў, фільмаў, спектакляў. І я б хацеў, каб вы з першага верасня расказвалі сваім вучням аб нашых цудоўных дасягненнях. Гэта вельмі важна. Калі яны будуць пра гэта ведаць, то будуць упэўненыя, што кожны з іх патрэбны нашай краіне і што яны абавязкова раскрыюць свой творчы патэнцыял і самарэалізуюцца», — звярнуўся Руслан Чарнецкі да ўдзельнікаў форуму.

На яго думку, у прафесію настаўніка павінны прыходзіць людзі, якія шчыра, усёй душой любяць сваю справу, вучняў і альма-матар. Без такога стаўлення немагчыма выхаваць сапраўды годных спецыялістаў, прафесіяналаў і грамадзян. Пры гэтым міністр культуры падкрэсліў, што не ўсе добрыя мастакі, танцоры і музыканты могуць быць добрымі педагогамі, як і не кожны добры педагог можа быць выдатным майстрам. 

«Мне здаецца, гэта справа індывідуальная. Калі чалавек народжаны быць педагогам і бачыць у тым сваё пакліканне, то гэта самае галоўнае. Таму што толькі пакліканне дае магчымасць адчуваць сябе на сваім месцы і аддаваць усяго сябе сваім вучням», — дадаў Руслан Чарнецкі.

Ён таксама падкрэсліў, што сёлета ўвага будзе ўдзяляцца патрыятычным маладзёжным праектам, бо маладым людзям неабходна вучыцца на прыкладах і ўроках гісторыі. «Натуральна, у нас плануецца вялікая колькасць мерапрыемстваў, звязаных з важнымі датамі. Мы жывём у вельмі цікавы, няпросты час, таму менавіта цяпер узнікаюць плённыя ідэі, якія натхняюць беларусаў на стварэнне розных рэчаў у абсалютна ўсіх сферах жыцця», — дадаў міністр культуры. 

Ён таксама ўручыў найлепшым спецыялістам ганаровыя ўзнагароды за высокія вынікі працы і адданасць сваёй справе.