Юнак сышоў з дому ўвечары 23 студзеня. Дзякуючы агульным намаганням яго знайшлі 26 студзеня ў Пінску. Трое сутак падлетка шукалі зводныя пошукавыя групы: міліцыянеры, ратавальнікі, валанцёры, мясцовыя жыхары, іншыя неабыякавыя людзі. Яны выкарыстоўвалі спецыяльную тэхніку, дроны, квадрацыклы для абследавання жылых і закінутых дамоў, падвальных памяшканняў, балоцістай мясцовасці, ляснога масіву паблізу Парахонска.

«Дзякуючы зладжанай рабоце пошукавых груп і шырокаму інфармаванню грамадскасці, а таксама пільнасці 36-гадовай пінчанкі, якая звярнула ўвагу на хлопца, падобнага па прыкметах з падлеткам, якога шукалі, удалося ўстанавіць месцазнаходжанне зніклага непаўналетняга. Як патлумачыў сам Багдан Юнчык, ён жыў у доме сямейнага тыпу, пасля сваркі з бацькам-выхавальнікам пакрыўдзіўся і вырашыў сысці. На дызель-цягніку падлетак дабраўся да Пінска, дзе і знаходзіўся ўвесь гэты час», — адзначылі ва УУС Брэсцкага аблвыканкама. 

У светлы час юнак гуляў па вуліцах, аднак людных месцаў і нарадаў міліцыі стараўся пазбягаць. Начаваў у закінутых памяшканнях. Вяртацца дадому пакрыўджаны падлетак не меў намеру. «У РАУС міліцыянеры пачаставалі непаўналетняга гарачай гарбатай і бутэрбродамі, а медыкі правялі агляд. Падлетак знаходзіцца ў здавальняючым стане», — дадалі ва УУС.

Праваахоўнікі выказалі падзяку ўсім, хто дапамагаў у пошуках хлопца.