Былы супрацоўнік KAS, які працаваў на пагранічным пераходзе ў Баброўніках (Падляскае ваяводства Польшчы), падчас суда прызнаў сябе вінаватым ва ўдзеле ў кантрабандзе цыгарэт. Ён пры гэтым заявіў, што не з’яўляўся неафіцыйным лідарам злачыннай групы, як кажа пракуратура, і што ўсе дзейнічалі на роўных і атрымлівалі за гэта грошы.

Абвінавачванне прад’яўлена дзевяці асобам, у тым ліку васьмі былым супрацоўнікам Падаткова-мытнай службы Польшчы. Расследаванне праводзілася Падляскім аддзяленнем Нацыянальнай пракуратуры.

Па даных следства, з восені 2018 года па вясну 2020-га ў Падляскім і Мазавецкім ваяводствах, дзейнічала арганізаваная злачынная група, якая займалася буйнамаштабнай кантрабандай цыгарэт. Яны кантрабандай увозілі цыгарэты ў Польшчу, у тым ліку праз аўтамабільны пагранічны пераход у Баброўніках, а затым незаконна ўводзілі іх у абарачэнне. Паводле расследавання, група ўвяла ў абарачэнне агулам не менш за 27 млн пачкаў цыгарэт розных марак. Страты ад нявыплаты падаткаў (акцызны падатак, мытныя пошліны, ПДВ) ацэньваюцца ў 626,2 млн злотых (больш за $168 млн).

Восем чалавек з групы, якая фігуруе ў гэтым абвінаваўчым заключэнні, з’яўляюцца былымі (і пасля звольненымі) супрацоўнікамі польскай мытнай службы ў Баброўніках. Іх абвінавачваюць у злачынствах, звязаных з карупцыяй, у тым ліку ў неаднаразовым невыкананні службовых абавязкаў, уключаючы барацьбу з кантрабандай, супрацоўніцтве з членамі злачыннай групоўкі, якое спрыяла правозу кантрабандных транспартных сродкаў праз мяжу.

Абвінавачванні датычацца хабараў на агульную суму амаль 4,9 млн злотых (звыш $1,3 млн). Сумы, якія, па сцвярджэнні пракуратуры, атрымалі абвінавачаныя, вар’іраваліся ад 10 тыс. да больш чым 924 тыс. злотых у залежнасці ад маштабу іх удзелу ў злачынствах і колькасці перавозак. Абвінавачаным пагражае да 10 гадоў пазбаўлення волі і буйныя штрафы.