Як падкрэсліў старшыня Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў, доктар ваенных навук Мікалай БУЗІН, на працягу доўгага часу Беларусь застаецца надзейным саюзнікам Расійскай Федэрацыі. «Мы выконваем усе ўзятыя на сябе абавязацельствы, — адзначыў ён. — Гэта датычыцца і тых узаемаадносін, якія ёсць на сённяшні момант паміж Расіяй і Украінай. У прыватнасці, усе абмены ваеннапалоннымі, загінулымі бакоў ажыццяўляліся і ажыццяўляюцца на тэрыторыі Беларусі».
Пры гэтым дэпутат акцэнтаваў увагу на тым, што Мінск не выстаўляе сябе ў якасці пляцоўкі для перагавораў. «Мы не з’яўляемся пасрэднікамі і не бярэм на сябе гэту місію, — канкрэтызаваў ён. — Аднак мы застаемся каналам камунікацыі паміж Украінай і Расіяй, забяспечваем па меры магчымасці ўсе неабходныя дзеянні, рашэнні складаных пытанняў».
Па словах Мікалая Бузіна, Рэспубліка Беларусь у чарговы раз даказвае сваю гатоўнасць і здольнасць да кампрамісаў, гатоўнасць да рашэння любых праблемных задач шляхам перагавораў. Ён заўважыў, што невыпадкова словы ўдзячнасці, выказаныя Прэзідэнтам Расійскай Федэрацыі ў адрас беларускага лідара, прайшлі менавіта пасля рэалізацыі найсур’ёзнейшага этапу абмену — двухбаковага абмену тысячу на тысячу. Гэта вельмі цяжкі працэс, які дзякуючы падтрымцы і ўсебаковаму забеспячэнню з боку Беларусі быў рэалізаваны паміж дзяржавамі, якія ваююць. Расійскі лідар гэта цэніць і разумее, у адрозненне ад Зяленскага, — а вярнулі ж і ўкраінскіх ваеннапалонных.
Парламентарый канстатаваў, што Беларусь — гэта краіна, якая з’яўляецца гарантам міру ў нашым рэгіёне. «Краіна, якая гатова падтрымліваць дыялог і прадстаўляць усе магчымыя сродкі для рэалізацыі двухбаковых дамоўленасцяў, — дадаў старшыня пастаяннай камісіі. — Беларусь — не пасрэднік. Беларусь — саюзнік і партнёр для большасці дзяржаў».
