У пачатку наступнага года Беларуская ўніверсальная таварная біржа (БУТБ) плануе дапоўніць лінейку ўжо публікуемых цэнавых індэксаў па біржавым рынку зводным індэксам на сухое малако, якое пастаўляецца на экспарт, і індывідуальнымі індэксамі на яго разнавіднасці — сухое абястлушчанае і сухое натуральнае малако. Акрамя таго, БУТБ мае намер укараніць цэнавыя індэксы на біржавыя тавары, якія рэалізуюцца на пазабіржавым рынку. Гэта лінейка індэксаў будзе грунтавацца на даных па пазабіржавых здзелках, якія, згодна з заканадаўствам, суб’екты гаспадарання абавязаны рэгістраваць на БУТБ. Такія індэксы будуць разлічвацца па пяці групах тавараў: чорных металах і сланечнікавым шроце на ўнутраным рынку і піламатэрыялах, рапсавым алеі і казеіне на знешнім. 

Пра гэта паведаміў начальнік упраўлення аналітыкі і перспектыўнага развіцця БУТБ Віталь Машчанка падчас чарговай нарады рабочай групы па стварэнні міжнароднай сістэмы індыкатараў таварных рынкаў. Мерапрыемства прайшло ў Бухары (Узбекістан), аб’яднаўшы прадстаўнікоў аналітычных службаў біржавых пляцовак Беларусі, Казахстана, Расіі, Туркменістана і Узбекістана.

«Упэўнены, што беларускі вопыт распрацоўкі метадалогіі разліку цэнавых індэксаў па пазабіржавых здзелках будзе карысны калегам з партнёрскіх біржаў пры фарміраванні ўласных нацыянальных цэнавых індыкатараў. Пазабіржавыя індэксы таксама можна будзе арганічна інтэграваць у міжнародную сістэму індыкатараў таварных рынкаў, якая ствараецца цяпер. Гэта дазволіць яе карыстальнікам прымаць максімальна ўзважаныя рашэнні, арыентуючыся на цэнавую кан’юнктуру на абодвух сегментах рынку — біржавым і пазабіржавым», — адзначыў Віталь Машчанка.

Па выніках нарады былі дасягнуты дамоўленасці па ўрэгуляванні астатніх пытанняў, якія датычацца стварэння міжнароднай сістэмы цэнавых індыкатараў. Такім чынам, наступным этапам праекта стануць практычныя мерапрыемствы па стварэнні сістэмы, накіраваныя ў першую чаргу на замацаванне арганізацыйных, юрыдычных і метадалагічных аспектаў, што запланавана на першы квартал 2026 года.