Па выніках візіту ў цэнтральны офіс Беларускай універсальнай таварнай біржы намесніка генеральнага дырэктара Цэнтра развіцця гандлёвай палітыкі Казахстана «QazTrade» Бауыржана Гайсы вызначаны ключавыя кірункі ўзаемадзеяння дзвюх арганізацый у рамках пагаднення аб супрацоўніцтве, падпісанага ў лістападзе мінулага года, паведамілі на біржы.
Акрамя абмену інфармацыяй і правядзення сумесных навучальных мерапрыемстваў для прадстаўнікоў казахстанскай бізнес-супольнасці, бакі плануюць засяродзіць намаганні непасрэдна на пытаннях павелічэння аб’ёмаў біржавога гандлю паміж Беларуссю і Казахстанам. Пры гэтым увага будзе надавацца не толькі пастаўкам беларускіх тавараў на рынак Казахстана, але і імпарту запатрабаванай у Беларусі прадукцыі казахстанскай вытворчасці.
Па словах госця, біржавая пляцоўка адкрывае рэальныя магчымасці для казахстанскіх кампаній як па закупцы, так і рэалізацыі тавараў у Беларусі, істотна спрашчаючы пошук дзелавых партнёраў і зніжаючы рызыкі, звязаныя са знешнегандлёвай дзейнасцю.
— Пазнаёміўшыся з прынцыпамі работы, асаблівасцямі і перавагамі беларускай біржавой платформы, магу з упэўненасцю сказаць, што гэты інструмент стане добрай дапамогай у вырашэнні агульнай задачы па павелічэнні ўзаемнага тавараабароту, якая стаіць перад намі. Ферасплавы, збожжа, баваўнянае валакно, сланечнікавы алей — усё гэта мы гатовыя пастаўляць у Беларусь праз біржу, — адзначыў ён.
Між іншым казахстанскаму боку цікавы і імпарт з Беларусі:
— У першую чаргу гэта такія тавары, як сухое малако, сметанковае масла, мяса, прадукцыя дрэваапрацоўкі. Біржа зручная тым, што тут усё сканцэнтравана — попыт і прапанова, імпарт і экспарт, сыравіна і гатовыя вырабы. Таму лічу, што скаардынаваная работа нашых арганізацый па рэалізацыі пагаднення аб супрацоўніцтве абавязкова паслужыць далейшаму ўмацаванню гандлёва-эканамічных адносін Казахстана і Беларусі, — падкрэсліў намеснік генеральнага дырэктара QazTrade.
Дарэчы, у 2025 годзе сума біржавых здзелак, здзейсненых на БУТБ рэзідэнтамі Рэспублікі Казахстан, павялічылася ў 1,5 раза, да больш чым 43 мільёнаў долараў. Галоўным драйверам росту стаў экспарт беларускай сельгаспрадукцыі, на які прыйшлося 96 % біржавога тавараабароту дзвюх краін. Лідарамі продажаў былі сухое малако, сметанковае масла, цукар, прадукцыя з ялавічыны і піламатэрыялы.
У мінулым годзе таксама прыкметна пашырыўся пул казахстанскіх удзельнікаў біржавых таргоў — са 146 да 201.
