Як расказалі арганізатары, па традыцыі фестываль будзе маштабным і яркім. Для гасцей падрыхтавалі захапляльныя трукавыя шоу, масавыя бітвы пешых рыцараў, штурм замка, піратэхнічнае і вогненнае шоу. А яшчэ — разнастайныя майстар-класы, горад майстроў, экскурсіі па гістарычных мясцінах і шмат смачных пачастункаў.

Урачыстае адкрыццё свята пройдзе ў 10:00 на Замкавай гары. Тут жа будуць працаваць разнастайныя тэматычныя пляцоўкі па кавальскай справе з майстар-класамі, падрыхтоўцы і продажы сярэднявечных пачастункаў. У 11:30 адбудзецца паказ гатычнай казкі «Помста і Магія льва» конна-гістарычнага клуба «Залатая шпора», а пасля пачнуцца бугурты і баі пешых рыцараў.

У 14:00 на Замкавай гары пройдуць паказальныя выступленні і трукавае шоу клуба «Шатландская пяхота», інтэрактыў з сярэднявечнай зброяй і майстар-клас па сярэднявечных танцах, а таксама фолк-дыскатэка.

У 16:30 тут стартуе традыцыйны турнір 17 стагоддзя, а таксама пройдуць тактычныя бугурты — «Захоп сцяга», «Ахова караля», масавыя бітвы і турнір лучнікаў.

Пасля гэтага, у 19:00 пачнуцца рыцарскія забавы, масавыя баі, тактычныя манеўры і тэатралізаваны штурм замка.

Завяршальным акордам на Замкавай гары стане канцэрт і яркае фаер-шоу.

Падчас фестывалю ўвесь горад ператворыцца ў тэматычныя пляцоўкі. Вулічная батлейка, квэсты, выставы-інтэрактывы, вялікі горад майстроў з вырабамі рамеснікаў, вулічныя музычныя імправізацыі, гульнявыя пляцоўкі і многае іншае — як падкрэслілі арганізатары, на фестывалі будзе цікава і дзецям, і дарослым.

Гулять Мсціслаў і яго госці будуць да позняй ночы. У 00:30 3 жніўня на Замкавай гары пройдзе паказ вогненнай сагі і канцэрт.