Больш за 170 работнікаў сферы АПК з усёй краіны з ліку тых, хто парушаў працоўную дысцыпліну падчас важных сельгасработ, на два месяцы адправілі ў брыгаду. З імі праводзілі заняткі па страявой, агнявой, медыцынскай падрыхтоўцы, а таксама знаёмілі з новым узбраеннем, тэхнікай і тэхналогіямі, напрыклад, беспілотнікамі. Аграрыі, якія часова надзелі ваенную форму, жылі па строгім вайсковым распарадку.

Андрэй Гарусаў з Гомельскай вобласці пяць гадоў таму ўжо прайшоў тэрміновую службу. «Успомніў нейкія навыкі з часоў тэрміновай службы, нешта новае нам расказалі. У першы час было складана прывыкаць да рэжыму дня. Тут пад’ём — у шэсць гадзін раніцы, а на нашым прадпрыемстве ў залежнасці ад сезона і віду работ у полі маглі выходзіць у восем ці дзевяць гадзін. Тут усё па строгім распарадку — ад прыёму ежы да адбою», — адзначыў мужчына.

Дома яго чакае сям’я — жонка і дзеці. «Было нялёгка яшчэ і маральна, таму што ты далёка ад блізкіх, з імі на такі тэрмін я не разлучаўся і цяпер вельмі хачу прыехаць, усіх абняць. Тут на многія рэчы пачаў глядзець па-іншаму. Прыеду ў родную гаспадарку больш адказным, буду да сябе больш строгім», — сказаў ён.

Няпростым выпрабаваннем сталі зборы для тых, каму яшчэ не даводзілася маршыраваць у вайсковых ботах па пляцы. У 48 гадоў упершыню стаў у армейскі строй палявод са Жлобінскага раёна Віталь Кавалёў. «Я раней не служыў, і для мяне армія стала сапраўдным адкрыццём. Ніколі не думаў, што абараняць Радзіму — гэта цэлая навука і столькі ўсяго трэба ведаць у ваеннай справе. Зборы прымусілі мяне пераасэнсаваць сваё жыццё. Вярнуся на асноўную працу больш дысцыплінаваным», — акцэнтаваў Віталь Кавалёў.

Міністр абароны Віктар Хрэнін звярнуўся да аграрыяў, якія прайшлі эксперыментальныя зборы ваеннаабавязаных з ліку спецыялістаў АПК. «На зборах вам давялося выконваць практычныя задачы па прыкрыцці паўднёвых рубяжоў краіны, фартыфікацыйным абсталяванні мясцовасці, патруляванні асабліва небяспечных напрамкаў украінска-беларускай граніцы. Гэта дазволіла ўмацаваць прафесійныя ўменні, удасканальваць навыкі, праверыць сябе ва ўмовах, набліжаных да баявых, і яшчэ раз пераканацца, наколькі важныя дысцыпліна, сабранасць і ўзаемная падтрымка. Асабліва важна тое, што вы працавалі як адзіная каманда. У ваеннай справе многае залежыць ад узгодненасці дзеянняў, дакладнага выканання загадаў і даверу адзін аднаму. Гэтыя якасці вы праявілі ў поўнай меры», — падкрэсліў кіраўнік абароннага ведамства.

Аграрыям, якія вызначыліся, Віктар Хрэнін уручыў гадзіннік на памяць. Падводзячы вынікі, міністр абароны заявіў, што такі «экзамен» для работнікаў АПК паказаў сваю эфектыўнасць. «Было шмат крыватолкаў, калі Прэзідэнт паставіў нам задачу заклікаць на ваенныя зборы ва Узброеныя Сілы спецыялістаў аграрнага комплексу. Гэты эксперымент даказаў толькі адно — калі Прэзідэнт прымае рашэнні, ён абапіраецца на свой каласальны вопыт, мудрасць і здольнасць прадбачыць вынік. Так яно і выйшла. Літаральна пару тыдняў ваеннаабавязаныя пабывалі на зборах, і мы ўжо з упэўненасцю маглі сказаць, што гэта нестандартнае рашэнне дасягнула сваёй мэты. Галоўнае — у нас вельмі добрыя людзі, працавітыя і адданыя сваёй радзіме. Трэба толькі знайсці да іх свой падыход. З кімсьці трэба было адкрыта і сумленна пагаварыць, хтосьці на гэтых зборах адкрыў у сабе магчымасці, пра якія ён раней і не здагадваўся. Армія заўсёды была донарам дысцыпліны, у арміі заўсёды вучаць парадку, сабранасці, адказнасці, самастойнасці, уменню трымаць сваё слова, своечасова і ў тэрмін выконваць задачы. А ўсе гэтыя якасці патрэбныя і на грамадзянцы. Падчас збораў ваеннаабавязаныя не толькі аднавілі навыкі армейскага ўкладу, але і прайшлі сур’ёзную перападрыхтоўку. Зборы былі насычаны заняткамі па тактычнай, агнявой, інжынернай, медыцынскай падрыхтоўцы. Аграрыі значна падцягнулі сваю страявую і фізічную вывучку, аднавілі навыкі валодання тэхнікай, зброяй. У цэлым са сваімі задачамі яны справіліся. Нашы людзі ўмеюць мяняцца, рабіць высновы. І мы змаглі пераканацца, што ў нас адна агульная задача — зрабіць краіну прыгажэйшай, мацнейшай, каб нашы людзі адчувалі ўпэўненасць у будучыні. Я лічу, што зборы сваёй мэты дасягнулі. І калі трэба, мы гатовыя гэту практыку развіваць і далей», — рэзюмаваў Віктар Хрэнін.