«Калі мы гаворым пра работнікаў культуры, насамрэч іх колькасць у Гродзенскай вобласці адносна невялікая — крыху больш за 5 тыс. чалавек. Але калі мы пачынаем пералічваць усе фестывалі, святы, канцэрты, якія прайшлі на працягу 2025 года, то прыходзім да лічбы, якая перавышае 137 тыс. мерапрыемстваў, гэта феномен. І больш за 200 мерапрыемстваў у спісе — брэндавыя, гэта значыць заснаваныя на народнай спадчыне, традыцыях, вядомыя далёка за межамі сваіх рэгіёнаў, — так пазначыў уклад сферы культуры ў стварэнне асаблівага іміджу Гродзеншчыны, рост яе турыстычнай папулярнасці намеснік старшыні Гродзенскага аблвыканкама Віктар Пранюк. — Фестываль нацыянальных культур, які сёлета пройдзе 15-ы раз, каравай-фэст „Бацькава булка“, „PROжарка по-волковысски“, „Воранаўскі дранік“ збіраюць тысячы гасцей. У адрэстаўраваны Стары замак у Гродне ў сезон стаяць чэргі наведвальнікаў. Экскурсанты з задавальненнем удзельнічаюць у майстар-класах народных умельцаў, знаёмячыся з традыцыйнымі тэхнікамі ткацтва, выцінанкі, ганчарства і іншых рамёстваў, якімі беларусы валодаюць стагоддзямі. Усё гэта працуе на турыстычную прывабнасць рэгіёна, а турызм — адзін з ключавых прыярытэтаў сацыяльна-эканамічнага развіцця нашай краіны».

Як расказала начальнік упраўлення культуры аблвыканкама Алена Клімовіч, будаўнікі і рэстаўратары працавалі летась на 44 аб’ектах гісторыка-культурнай спадчыны. Завершана рэканструкцыя Яўленскай царквы Свята-Успенскага Жыровіцкага манастыра, закансерваваныя сцены Крэўскага замка, абноўлена гістарычная агароджа царквы абарончага тыпу ў вёсцы Мураванка ў Шчучынскім раёне, новае аблічча набыў фасад будынка былога сядзібнага дома «Альбярцін» у Слоніме, дзе ў планах — работы ў памяшканнях. 

Вядзецца распрацоўка навукова-праектнай дакументацыі другой чаргі комплексу Старога замка ў Гродне — самага папулярнага тураб’екта ў рэгіёне. Рыхтуецца перадпраектная дакументацыя для рэканструкцыі з рэстаўрацыяй млына ў ансамблі былога палаца Агінскіх у Залессі.

Спіс такіх аб’ектаў на багатай гістарычнай спадчынай Гродзеншчыне шырокі: работы ідуць у галоўным корпусе былога брыгіцкага манастыра, комплексе будынкаў былога піваварнага завода ў Гродне, Палацава-паркавым комплексе «Свяцк», комплексе Мікалаеўскага касцёла ў Міры. Статус гісторыка-культурнай каштоўнасці набыў у мінулым годзе знакаміты будынак Гродзенскага абласнога драмтэатра — адна з візітных картак горада на Нёмане.

Папулярызуюць Прынёманскі край 1130 майстроў народнай творчасці. Амаль 40 з іх маюць ганаровае званне народнага майстра Рэспублікі Беларусь, 7 гэты статус прысвоены ў 2025 годзе.

У Дзяржаўным спісе гісторыка-культурных каштоўнасцяў Рэспублікі Беларусь прадстаўлены 25 элементаў нематэрыяльнай спадчыны Гродзеншчыны. Літаральна пад заслону мінулага года статус гісторыка-культурнай каштоўнасці атрымала традыцыя вырабу чарнаглянцавай керамікі ў Свіслацкім раёне. У райцэнтры ўзнавілі двухкамерны горн, цяпер старадаўняе майстэрства могуць бачыць і асвойваць не толькі майстры, але і турысты.