Дынаміку развіцця супрацоўніцтва на сустрэчы ў рамках праграмы форуму абмеркавалі губернатар Бранскай вобласці Расійскай Федэрацыі Аляксандр Багамаз і старшыня Гомельскага аблвыканкама Іван Крупко.
- — Больш за 60% нашага гандлёвага абароту прыпадае на Беларусь, траціна — на Гомельскую вобласць, — адзначыў Аляксандр Багамаз. — Калі ў першым форуме ўдзельнічала дваццаць прадпрыемстваў, то ў цяперашнім — больш за сто.
Кіраўнік Бранскай вобласці падзякаваў беларускім партнёрам за паспяховы вопыт супрацоўніцтва ў будаўнічай сферы і прапанаваў прыняць удзел у новых праектах узвядзення аб’ектаў і капітальным рамонце жылфонду.
У сваю чаргу, старшыня Гомельскага аблвыканкама Іван Крупко выказаў упэўненасць у тым, што форум дазволіць раскрыць новы патэнцыял сумесных магчымасцей.
— Дзякуй Бранскай зямлі за гасціннасць. Упэўнены, што, як і ў папярэднія гады, у рамках форуму мы зможам раскрыць патэнцыял сумесных магчымасцей. У ваш рэгіён сваю прадукцыю пастаўляюць каля 180 прадпрыемстваў Гомельшчыны, — адзначыў Іван Крупко.
Адной з ключавых кропак прыцягнення на форуме «Бранск-Гомель» стала выстава дасягненняў. Прамысловыя і харчовыя прадпрыемствы двух абласцей прадставілі як добра знаёмую спажыўцам прадукцыю, так і навінкі. Усяго свой патэнцыял на форуме прадставілі больш за сто кампаній з абодвух бакоў.
- Асаблівую ўвагу ўдзельнікаў прыцягнулі сумесныя праекты прадпрыемстваў «Брансксельмаш» і «Тэрматрон»: камбайны, прадукцыя для высокахуткасных магістраляў і станкі для вытворчасці чыгуначных восей.
Як асабліва падкрэсліў на ўрачыстым адкрыцці форуму старшыня Гомельскага аблвыканкама Іван Крупко, партнёрства ў эканамічнай сферы — гэта рэальная работа для забеспячэння дабрабыту людзей.
— За I паўгоддзе гэтага года Гомельская вобласць паставіла на Браншчыну прадукцыі на 7 мільярдаў расійскіх рублёў. Бранчане пастаўляюць у паўднёва-ўсходні рэгіён Беларусі каля 2000 таварных пазіцый, — звярнуў увагу кіраўнік Гомельскага рэгіёну. — Эканамічнае партнёрства — не проста лічбы, а тысячы рабочых месцаў і ўпэўненасць сем’яў у заўтрашнім дні. Упэўнены, сённяшні форум прынясе не тольны новыя кантракты, але і ўмацуе галоўнае, што ёсць паміж намі, — давер і павагу, — падкрэсліў Іван Крупко.
Лідары двух рэгіёнаў аднагалосна заявілі, што моцныя эканамічныя сувязі Гомельшчыны і Браншчыны былі б немагчымыя без агульных духоўных каштоўнасцей і гістарычнай памяці, якія старанна захоўваюць брацкія народы.
Яркім пацверджаннем моцных сувязяй стала цырымонія ўзнагароджання. Губернатар Бранскай вобласці Аляксандр Багамаз адзначыў вялікі ўклад у двухбаковае супрацоўніцтва калектываў Гомельскага хімзавода, «Гомельагаракомплекта» і Гомельскага ДСК. Бранскія прадпрыемствы таксама былі адзначаныя за актыўную працу з беларускімі партнёрамі.
Наталля Капрыленка
фота ТК «Гомельшчына афіцыйна»
