Загадзя былі вызначаны тры асноўныя пляцоўкі для навядзення парадку. Удзельнікі суботніка працавалі на ўездзе ў горад з трасы М1, гэта вуліца Маскоўская, а таксама на вуліцах Ковельскай і Абаронцаў Айчыны. На Маскоўскай працоўны дэсант узначаліў старшыня Брэсцкага гарвыканкама Сяргей ЛАБАДЗІНСКІ. «Сваім прыкладам хочам даць старт усяму гораду ў справе вясновай прыборкі. Зараз працуем каля ўязной групы, якая сустракае нашых гасцей. Летась прыбралі з аднаго боку стэлы, цяпер наводзім парадак з другога», — адзначыў кіраўнік горада.

У Брэсце з 1 сакавіка да 19 красавіка аб’яўлены месячнік па добраўпарадкаванні. Да акцыі падключаюцца прадпрыемствы і арганізацыі, установы адукацыі, аховы здароўя, культуры, а галоўнае — многія нераўнадушныя грамадзяне. «Усе разам мы зробім наш горад найпрыгажэйшым, — падкрэсліў Сяргей Лабадзінскі і нагадаў, што горад — у чаканні святкавання 80-годдзя Вялікай Перамогі. І падчас месячніка па добраўпарадкаванні будзе ўдзяляцца асаблівая ўвага памятным мясцінам, абласны цэнтр да гэтай даты вельмі старанна прыбярэцца».

Разам з мэрам на ўчастку — з правага боку тэльмінскага лесу — працавалі калегі з гарадскога выканаўчага камітэта, ваеныя, студэнты, навучэнцы.

Асабліва актыўна ўдзельнічалі дэпутаты гарадскога Савета. Паводле слоў старшыні Брэсцкага гарадскога Савета Андрэя ФІЛАНОВІЧА, брастаўчане маюць вялікі вопыт у справе паляпшэння тэрыторый талакой. Менавіта суботнікі, акцыі прадстаўнікоў працоўных калектываў, грамадскіх арганізацый, моладзі ў свой час адыгралі вялікую ролю пры аднаўленні парку Воінаў-інтэрнацыяналістаў. Паляпшэнне парку стала справай усяго Маскоўскага раёна Брэста. Там працавалі некалькі гадоў, былі выдзелены пэўныя сродкі з гарадскога бюджэту на добраўпарадкаванне, якія паспяхова асвойваліся профільнымі арганізацыямі. Але работа па санітарнай ачыстцы, праведзеная рукамі гараджан, дазволіла зрабіць парк светлым, прывабным для сямейнага адпачынку. У чым мы ўсе разам змаглі яшчэ раз упэўніцца падчас святкавання Масленіцы ў мінулую нядзелю. І заўсёды завадатарамі добрай справы былі дэпутаты ўсіх узроўняў.

Па гэтым жа прынцыпе падышлі да паляпшэння лесапаркавага масіву ў раёне вуліцы Медыцынскай. Там ужо прайшло некалькі працоўных акцый, новыя запланаваны і на гэту вясну. Вельмі радуе, што ў суботніках актыўна ўдзельнічае моладзь. Вось і гэтым разам на гарадскі суботнік выйшлі студэнты нашых навучальных устаноў, актывісты грамадскіх арганізацый. Дэпутацкі дэсант на аб’екце каля трасы М1 узначаліў намеснік старшыні гарадскога Савета Алег НЕСЦЯРУК.

Начальнік Брэсцкай гарадской і раённай інспекцыі прыродных рэсурсаў і аховы навакольнага асяроддзя Аляксандр ХУДОБКА адзначыў, што ў рамках месячніка будзе наводзіцца парадак на самых розных тэрыторыях, у тым ліку на тэрыторыі гаражных кааператываў, садаводчых таварыстваў. Ён выказаў упэўненасць, што большасць гараджан далучацца да добрай справы, бо ўсе ж хочуць жыць у прыгожым і чыстым горадзе.

Фота Брэсцкага гарвыканкама