Госці ўбачаць усю разнастайнасць адценняў і формаў, якія толькі магчымыя ў нарцысаў.

Цэнтральны батанічны сад НАН Беларусі пачаў збіраць сваю легендарную калекцыю яшчэ ў 1958 годзе, і сёння яна налічвае 436 таксонаў. Сярод іх вылучаецца старэйшына — паэтычны нарцыс «Гарацый» (Horace), якому ўжо больш за 130 гадоў. Асаблівую чароўнасць выставе надаюць нарцысы з расшчэпленай каронкай, формы якіх настолькі незвычайныя, што здаюцца фантастычнымі. Махрыстыя сарты, якія з’явіліся ў 60-х гадах мінулага стагоддзя, таксама з’яўляюцца сапраўднай жамчужынай калекцыі. Сярод іх можна ўбачыць цалкам махрыстыя бутоны сартоў Obdam, My Story і Texas, а таксама вытанчаныя кветкі з махрыстай каронкай — Ice King і Bridal Crown. 

Выстава будзе працаваць з 17 па 21 красавіка, уключаючы панядзелак, 20 красавіка, з 11.00 да 19.00 у выставачным павільёне. Для наведвання неабходна набыць уваходны квіток у Батанічны сад.