З 1 чэрвеня па 15 верасня ў Кобрынскім раёне праходзіць спецыяльная праграма «Мак». Праваахоўнікі праводзяць маштабную працу па знішчэнні незаконных пасеваў нарказмяшчальных раслін. «У жніўні былі актыўна спыненыя спробы яе вырошчвання, збору і распаўсюджвання», — паведаміў начальнік аддзялення па наркакантролі і супрацьдзеянні гандлю людзьмі крымінальнай міліцыі аддзела ўнутраных спраў Кобрынскага райвыканкама Валерый Рэкець.

У жніўні супрацоўнікамі Кобрынскага РАУС і Кобрынскага аддзела Дэпартамента аховы было выяўлена тры факты росту канопляў на агульнай плошчы 62 кв. м, агульная маса знішчанай наркасыравіннай базы склала 32,7 кг.

Дзякуючы актыўнай растлумачальнай рабоце з насельніцтвам, на прысядзібных участках Кобрынскага раёна за мінулы месяц не было выяўлена ніводнага выпадку вырошчвання забароненых нарказмяшчальных раслін.

Акрамя таго, праваахоўнікі ўстанавілі тры выпадкі злачынстваў па лініі незаконнага абароту наркотыкаў, з якіх адно звязана са збытам. Імі было канфіскавана больш за 15 г наркатычных сродкаў і псіхатропных рэчываў.

Кобрынскі РАУС просіць жыхароў раёна інфармаваць міліцыю аб фактах збыту, захоўвання, вырабу, вырошчвання наркатычных сродкаў або любых незаконных дзеянняў, звязаных з абаротам наркотыкаў. Канфідэнцыяльнасць гарантуецца.