Толькі з пачатку года магчымасцю пракансультавацца скарысталіся больш за 2 тысячы грамадзян. Сярод пытанняў, з якімі найбольш часта звяртаюцца людзі, — умовы выканання кантракта, парадак канчатковага разліку пры звальненні, прадастаўленне працоўных і сацыяльных водпускаў, выплата матэрыяльнай дапамогі і гарантыі па калектыўных дагаворах.

— Такая практыка — гэта магчымасць аператыўна атрымаць прадметную кансультацыю і дапамогу. У многіх выпадках, на прававы прыём грамадзяне прыходзяць з неабходнымі дакументамі, якія дапамагаюць максімальна акунуцца ў пытанне. Акрамя таго, калі неабходна юрысты на месцы дапамагаюць скласці працэсуальныя дакументы і звароты ў адпаведныя службы і дзяржорганы. Дарэчы, на прыёмах прысутнічаюць прадстаўнікі пракуратуры, якія таксама падключацца да вырашэння пытанняў тых, хто звярнуўся, — расказала начальнік галоўнага ўпраўлення юрыдычнай работы і прававога забеспячэння Федэрацыі прафсаюзаў Беларусі Марына Лазар. — Адзначу, што з чэрвеня аб’яўляецца перапынак у правядзенні выязных прававых прыёмаў, адновіцца такая практыка з верасня. Разам з тым прафсаюзныя юрысты прадоўжаць аказваць неабходную дапамогу ў любых зручных для грамадзян формах — па тэлефоне, праз пісьмовы зварот або праз зварот на спецыяльны сэрвіс на Інтэрнэт-партале ФПБ.

Трэба адзначыць, што не рэдкія выпадкі, калі прафсаюзныя юрысты падчас прававога прыёму вядуць перамовы з наймальнікамі тых, хто звярнуўся для вырашэння працоўнага пытання. Напрыклад, у Магілёўскай вобласці ў красавіку на прыём звярнуўся шматдзетны бацька, якому наймальнік адмовіў у прадастаўленні дадатковага аплатнага выхаднога дня ў тыдзень на падставе, што жонка заяўніка не працуе. Заканадаўствам прадугледжана, што ў поўнай сям’і догляд дзіцяці ва ўзросце да трох гадоў адным з бацькоў прыраўноўваецца да занятасці другога з бацькоў. Юрыст перагаварыў з наймальнікам, растлумачыў нюансы Працоўнага кодэкса. Пытанне ўдалося вырашыць станоўча.

А ў Быхаве на прыёме паступіла пытанне ад маладога спецыяліста, які не атрымлівае даплаты да заработнай платы. Як высветлілася, малады работнік не можа атрымаць законны дадатак з-за страты пасведчання з асабістай справы. Падчас прыёму прафсаюзны юрыст звязаўся з выканкамам і ВНУ, выпрацаваў схему, якая дазволіць аднавіць дакументы. Пытанне заставалася на кантролі ў прадстаўніка прафсаюза — на сённяшні дзень малады спецыяліст ужо пачаў атрымліваць належную даплату.

Нагадаем, задаць сваё пытанне і пракансультавацца можна па тэлефоне Міжгаліновага маніторынгавага цэнтра ФПБ — 8 801 100 1111. Званок бясплатны для абанентаў «Белтэлекама» і мабільных аператараў БеСТ (Life), A1, МТС. Звароты прымаюцца з панядзелка па чацвер з 8.30 да 17.30, у пятніцу з 8.30 да 16.15.

Алена КРАВЕЦ