У Магілёўскім драматычным тэатры паведамілі, што ў праграме форуму — 17 пастановак з Беларусі, Расіі і Казахстана. Гледачы асабліва актыўна купляюць білеты на класіку ў сучаснай рэжысуры.

Поўнасцю распрададзены білеты на пяць спектакляў: «Хутар» Беларускага дзяржаўнага тэатра лялек, «Майстар і Маргарыта» Беларускага дзяржаўнага акадэмічнага тэатра юнага гледача, «Дама з сабачкам» Маскоўскага Губернскага тэатра, «Пікавая дама» Смаленскага камернага тэатра і «Яўген Анегін» Арлоўскага тэатра імя І.С.Тургенева. 

«Попыт на форум расце з кожным годам. Людзі хочуць бачыць знаёмыя сюжэты ў новым прачытанні», — адзначылі ў тэатры. 

Таксама лічаныя білеты засталіся на спектаклі Гродзенскага тэатра лялек «Пікавая дама», «Чайка» Магілёўскага драмтэатра, «Чэхаў. Вадэвілі» казахстанскага Тэатра імя Ф.М.Дастаеўскага, «Насферату» пермскага тэатра «Век жыцця» і «Чорныя дошкі» Уладзімірскага драмтэатра.

Перад афіцыйным адкрыццём на плошчы перад будынкам Магілёўскага драматычнага тэатра гледачоў чакаюць хадулісты, жывыя скульптуры, перформансы і вулічныя інтэрмедыі з удзелам артыстаў тэатра.

Упершыню на форуме выступіць маскоўскі тэатр «Школа драматычнага мастацтва». Рэжысёр Глеб Чарапанаў прывёз спектакль «Дзядзечкаў сон» паводле Дастаеўскага. Пастаноўка ўжо адзначана на фестывалі «Белая Вежа» ў Брэсце.

Праграма робіць акцэнт на класіцы ў сучасных інтэрпрэтацыях. Асобны блок прысвечаны тэатрам лялек. Для аматараў харэаграфіі пакажуць «Шынель. Гогаль» Беларускага дзяржаўнага маладзёжнага тэатра.

На міжнародным маладзёжным тэатральным форуме «М.@rt.кантакт» пакажуць не толькі цікавыя спектаклі, але і правядуць майстар-класы ад педагогаў, драматургаў і рэжысёраў. Пройдуць творчыя лабараторыі і сустрэчы з артыстамі.

«Мы стараліся сабраць праграму, дзе кожны знойдзе спектакль даспадобы — ад камернай драмы да маштабнага перформанса», — падзяліліся ў тэатры.