У статыстыку бізнес-дэмаграфіі за мінулы год упершыню ўключаны даныя па індывідуальных прадпрымальніках. Агульная колькасць актыўных прадпрыемстваў — юрыдычных асоб, якія з’яўляюцца камерцыйнымі арганізацыямі, і індывідуальных прадпрымальнікаў — за мінулы год склала 268 619.

«Колькасць актыўных прадпрыемстваў — юрыдычных асоб, якія з’яўляюцца камерцыйнымі арганізацыямі, прадаўжае расці. У 2025 годзе яна склала 116 790, што на 4,4% больш, чым годам раней. Найбольшая доля актыўных арганізацый па-ранейшаму прыпадае на гандаль — 33,3%», — расказалі ў Белстаце.

У мінулым годзе з’явілася 13 799 прадпрыемстваў, што на 1,4% больш, чым у 2024 годзе. Найбольшую ўдзельную вагу сярод новых прадпрыемстваў традыцыйна склалі арганізацыі гандлю — 40,5%. Самы высокі ўзровень «нараджальнасці» паказалі арганізацыі, якія адносяцца да сферы творчасці, спорту, забавы і адпачынку — 24%.

«Беларускія арганізацыі ўсё гэтак жа дэманструюць добрую выжывальнасць. Узровень выжывальнасці прадпрыемстваў на працягу двух гадоў пасля „нараджэння“ ў 2025 годзе склаў 77,2%, што на 2,2 працэнтнага пункта больш, чым годам раней», — звярнулі ўвагу ў Белстаце.

У 2025 годзе 1039 прадпрыемстваў паказалі высокі тэмп росту, іх колькасць у параўнанні з 2024 годам павялічылася на чвэрць. Найбольшую ўдзельную вагу сярод іх займалі прамысловыя арганізацыі — 24,1%. Колькасць прадпрыемстваў-«газелей» склала 168 (плюс 3,1%), прадпрыемстваў-«мышэй» — 1107 (плюс 16,9%).

Колькасць актыўных прадпрыемстваў — індывідуальных прадпрымальнікаў склала 151 829.

Сярод індывідуальных прадпрымальнікаў 63,5% складаюць мужчыны і 36,5% — жанчыны. Пры гэтым сярэдні ўзрост мужчын-прадпрымальнікаў — 44 гады, жанчын — 48 гадоў. Найбольшая доля індывідуальных прадпрымальнікаў прыпадае на гандаль — 36,6%.

Пры выбары сферы дзейнасці захоўваюцца адрозненні па поле: мужчыны часцей прадстаўлены ў будаўніцтве (95,8% ад усіх індывідуальных прадпрымальнікаў у будаўніцтве), транспарце (88,1%), сельскай гаспадарцы (84%), тады як жанчыны — у ахове здароўя (81,4%), адукацыі (73,9%) і прафесійнай, навуковай і тэхнічнай дзейнасці (53,8%).

Бізнес-дэмаграфія — галіна статыстыкі, аб’ектам даследавання якой з’яўляюцца дэмаграфічныя працэсы, што адбываюцца з юрыдычнымі асобамі, якія з’яўляюцца камерцыйнымі арганізацыямі, і індывідуальнымі прадпрымальнікамі.

Прадпрыемства з высокімі тэмпамі росту — прадпрыемства, якое за апошнія тры гады паказвала сярэднегадавы прырост колькасці наёмных работнікаў і абароту больш як 20% у год, пры гэтым колькасць у пачатку росту — не менш як 10 чалавек.

Прадпрыемства-«газель» — прадпрыемства, якое «нарадзілася» 4 або 5 гадоў таму і за апошнія тры гады паказвала сярэднегадавы прырост колькасці наёмных работнікаў і абароту больш як 20% у год, пры гэтым колькасць у пачатку росту — не менш як 10 чалавек.

Прадпрыемства-«мыш» — прадпрыемства, якое за апошнія тры гады паказвала сярэднегадавы прырост колькасці наёмных работнікаў і абароту больш як 20% у год, пры гэтым колькасць у пачатку росту — ад 5 да 10 чалавек.