Вольга Грабеня адзначыла, што і ў сям’і, і ў прафесійнай сферы ад жанчыны многае залежыць. Менавіта жанчына — мама, жонка — стварае ўтульнасць. Гэта ў тым ліку датычыцца адзення.

Тут вельмі важна казаць пра культуру спажывання, упэўненая Вольга Грабеня. «Разуменне жанчынай таго, што важна для сям’і, становіцца важным для ўсёй краіны», — лічыць яна.

Гаворачы аб тэндэнцыях і модзе, яна адзначыла, што жанчыны — самыя спрактыкаваныя гледачы модных паказаў і ведаюць усе апошнія кірункі. «Сочаць за паказамі, многія наведваюць іх, глядзяць па тэлевізары, вывучаюць трэнды ў Інтэрнэце. Але калі казаць пра прадпрыемствы канцэрна, то ўсачыць дасканала за ўсімі тэндэнцыямі мы не можам, ды і не трэба. Важна разумець, што модныя трэнды з парыжскіх подыумаў прыходзяць у звычайнае жыццё праз год-два — мода адаптуецца. Менавіта адаптаваная мода прасочваецца пры вытворчасці калекцый нашых прадпрыемстваў», — звярнула яна ўвагу.

Паводле яе слоў, беларускія дызайнеры і мадэльеры штогод адсочваюць колеравыя тэндэнцыі, фактуры тканін, актуальныя кірункі і ўжываюць іх у рабоце. «Тое, што модна на парыжскіх пляцоўках, мы адаптуем і на працягу года-двух выкарыстоўваем пры вытворчасці прадукцыі», — сказала Вольга Грабеня.