«На бягучы момант у Беларусі ўстанавілася анамальна халоднае надвор’е з сярэднясутачнай тэмпературай на 7-18 градусаў ніжэй за кліматычную норму. Так, у ноч з 13 на 14 студзеня мінімальная тэмпература паветра склала 12-19 градусаў марозу, месцамі паветра астудзілася да мінус 20-26 градусаў, пры гэтым на метэастанцыі Орша слупкі тэрмометраў зафіксавалі мінус 27 градусаў, а на аўтаматычнай станцыі Вялікі Межнік — 30 градусаў марозу. Такіх маразоў не назіралася з лютага 2021 года. А вось днём 14 студзеня максімальная тэмпература паветра знаходзілася ў межах 10-17 градусаў марозу, месцамі слупкі тэрмометраў змаглі дацягнуцца да мінус 8-9 градусаў», — расказалі сіноптыкі. 

15 студзеня начныя мінімумы склалі мінус 17-22, месцамі па поўначы і ўсходзе краіны паветра астудзілася да 23-27 градусаў марозу, у крайніх заходніх і паўночна-ўсходніх раёнах краіны тэмпература не апускалася ніжэй за мінус 9-15 градусаў. Месцамі па краіне прайшоў снег, адзначылі ў Белгідрамеце.

Паводле прагнозаў сіноптыкаў, у бліжэйшы час у Беларусі на фоне вобласці павышанага атмасфернага ціску, сфарміраванай у халоднай паветранай масе, чакаецца пераважна сухое і марознае надвор’е са значнымі тэмпературнымі кантрастамі паміж больш цёплым захадам і халодным усходам.