Спаборніцтвы прайшлі ў Рузе Маскоўскай вобласці. 19 лютага Ілья Шымановіч заняў другое месца на дыстанцыі 50 м брасам, саступіўшы прадстаўніку Магаданскай вобласці Івану Кажакіну. Яшчэ адно серабро беларускай камандзе прынёс Арцём Ярмак, які на стаметроўцы на спіне размясціўся ўслед за Міронам Ліфінцавым з Санкт-Пецярбурга. Напапярэдні Ярмак і Шымановіч таксама падымаліся на подыум: Арцём узяў золата на 50-метроўцы на спіне, а Ілья быў другім на сотні брасам.

Агульны вынік нашай каманды на турніры ў Рузе склаў чатыры медалі (1-3-0). У чацвер вынікі ў топ-15 у сваіх відах праграмы паказалі яшчэ пяцёра беларусаў: Маргарыта Калістратава (5-я, 50 м на спіне), Аляксандра Шляйко (11-я, 200 м вольным стылем), Марына Васілевіч (11-я, 50 м вольным стылем), Расціслаў Аўдзей і Генрых Танковіч (14-ы і 15-ы, 200 м брасам). Другі этап Кубка Расіі па плаванні 21-22 лютага прыме Обнінск.