Галоўны трэнер беларускай каманды Аляксандр Чэрнік запрасіў на заключны збор 16 футбалістаў: варатары — Аляксандр Антонаў («ІрАэра», Іркуцк, Расія), Аляксей Лукша («Сталіца», Мінск), Арцём Петухоў (БЧ, Гомель); палявыя ігракі — Максім Батурын, Павел Рагавік (усе — «Вітэн», Орша), Юрый Дубкоў, Аляксей Пінчук, Уладзіслаў Сялюк (усе — ВРЗ, Гомель), Арцём Козел, Аляксандр Умпіровіч, Дзмітрый Шыманоўскі, Ігар Шчэрбіч, Арцём Якубаў (усе — «Сталіца», Мінск), Данііл Крывіцкі («Сібірак», Новасібірск, Расія), Сяргей Крыкун, Дзмітрый Швядко (абодва — КПРФ, Масква, Расія). З учарашняга дня каманда трэніруецца на базе спарткомплексу «Жамчужына» ў Маларыце, а 19 студзеня адправіцца ў Любляну. У выязны склад увойдуць 2 варатары і 12 палявых ігракоў.

Фінальная стадыя 13-га чэмпіянату Еўропы па міні-футболе пройдзе з 27 студзеня па 7 лютага 2026 года ў Латвіі, Літве і Славеніі. У папярэдняй групе С у славенскай сталіцы беларусы сустрэнуцца з камандамі Бельгіі (23 студзеня), Іспаніі (26 студзеня) і Славеніі (29 студзеня). Склады астатніх квартэтаў: А (Рыга) — Латвія, Грузія, Францыя, Харватыя; В (Каўнас) — Літва, Украіна, Чэхія, Арменія; D (Любляна) — Польшча, Венгрыя, Партугалія, Італія. У чвэрцьфінал выйдуць па дзве лепшыя каманды з кожнай групы.

Беларуская зборная другі раз у сваёй гісторыі выступіць сярод лепшых дружын Старога Свету. У 2010 годзе на ЧЕ ў Венгрыі каманда Валерыя Дасько не змагла выйсці з групы, прапусціўшы наперад будучага чэмпіёна Іспанію і сярэбранага прызёра Партугалію. 

Чатыры гады таму ў Нідэрландах сваё другое золата кантынентальнага першынства заваявала каманда Партугаліі, якая перамагла ў вырашальным паядынку расіян з лікам 4:2. У гульні за бронзавыя ўзнагароды іспанцы абыгралі зборную Расіі — 4:1. Зборная Іспаніі сем разоў станавілася чэмпіёнам Еўропы, па два тытулы ў Італіі і Партугаліі, адзін — у Расіі.