Конкурс у Беларусі праводзіцца ўжо трэці раз і традыцыйна накіраваны на прэзентацыю і падтрымку таленавітай моладзі. У гэтым годзе ўдзельнікі спаборнічалі ў намінацыях «Скульптура», «Жывапіс», «Графіка», «Дэкаратыўна-прыкладное мастацтва», «Манументальнае і манументальна-дэкаратыўнае мастацтва», «Мастацкая дынастыя» і «За ўклад у развіццё выяўленчага мастацтва».

На ўдзел у конкурсе было пададзена больш за 200 заявак ад студэнтаў, навучэнцаў і выпускнікоў больш як 30 профільных устаноў адукацыі краіны.

У намінацыі «Жывапіс» прызавое месца заняла магістрантка Беларускай дзяржаўнай акадэміі мастацтваў Ганна Раманенка з работай «Наш абавязак — памятаць». «Я хацела падрыхтаваць работу, звязаную з захаваннем памяці, але не маляваць зброю, ваенную тэхніку або форму. Хацелася ўзяць больш творчую і цёплую тэму. Таму я пастаралася перадаць, як бацька абараняе сваё дзіця, як памяць пра абавязак, пра тое, што трэба берагчы наша будучае пакаленне, нашых дзяцей», — расказала яна пра работу, якую рыхтавала да 80-годдзя Перамогі.

Натхненнем для вобраза дзяўчынкі, намаляванай на карціне, сталі ваенныя фатаграфіі дзяцей, убачаныя Ганнай Раманенка ў музеях. На выкананне задумкі ёй спатрэбілася каля пяці месяцаў.

У намінацыі «Скульптура» пераможцам стаў Фёдар Шурмялёў з работай «Шлях». Для яго гэта не першае «Трыенале». Ён ужо займаў прызавое месца ў намінацыі «Літаграфія». У аснову работы Фёдара пакладзена экалагічная тэматыка. Вялікі спіл дрэва з кольцамі жыцця трымаецца на невялікай постаці чалавека. «Сэнс у тым, што чалавек можа як нешта дрэннае зрабіць, знішчыўшы нейкія віды жывёл, дрэў і раслін, так і ўсё гэта захаваць», — расказаў ён.

«Трыенале», паводле слоў Фёдара Шурмялёва, як і многія такія конкурсы, адыгрывае важную ролю для творчай супольнасці. «З аднаго боку, гэта саперніцтва, якое прыводзіць да росту. З другога — любому аўтару важна паказваць сябе, глядзець на калег. Тут сапраўды зрэз сучасных маладых аўтараў», — адзначыў удзельнік.

Ва ўзнагароджанні пераможцаў прыняў удзел намеснік начальніка галоўнага ўпраўлення дзяржаўных спецыяльных культурных мерапрыемстваў — начальнік упраўлення прафесійнага мастацтва Міністэрства культуры і член журы конкурсу Вадзім Зайцаў. Ён адзначыў, што на такіх мерапрыемствах заўсёды хочацца ўбачыць нешта новае. «І ў гэтым выпадку хочацца адзначыць, што журы конкурсу доўга не магло выбраць пераможцу. І ўсё таму, што ўзровень работ быў высокі», — падкрэсліў ён.

Арганізатарамі конкурсу традыцыйна выступілі Міністэрства культуры і Нацыянальны цэнтр сучасных мастацтваў. Намеснік дырэктара па творчай рабоце цэнтра Алеся Іназемцава падкрэсліла, што трэцяе «Трыенале маладых мастакоў» па-сапраўднаму адбылося. «На мой погляд — гэта адно з самых значных мерапрыемстваў па падтрымцы маладых таленавітых мастакоў у нашай краіне. І экспазіцыя рэспубліканскай выставы паказала, якія тэмы, вобразы, напрамкі навогул былі актуальныя для беларускага грамадства за гэтыя тры гады і актуальныя сёння», — адзначыла яна.

Выстава ў Нацыянальным цэнтры сучасных мастацтваў адкрыецца 13 снежня. Па традыцыі гледачы экспазіцыі змогуць аддаць свой голас за ўдзельніка, які спадабаўся, і выбраць пераможцу ў намінацыі «Глядацкая сімпатыя»