Надзвычайны і Паўнамоцны Пасол Індыі ў Беларусі Ашок Кумар наведаў з рабочым візітам Гродзенскую вобласць. Яго мэта — умацаваць сувязі паміж рэгіёнам і Індыяй. Гэта датычыцца не толькі развіцця эканамічных адносін, але і пашырэння супрацоўніцтва ў гуманітарнай сферы.
Падчас візіту дыпламат сустрэўся са старшынёй Гродзенскага аблвыканкама Юрыем Караевым. Яны абмеркавалі перспектывы далейшага ўзаемадзеяння і яго патэнцыйныя перавагі. Як падкрэсліў кіраўнік рэгіёну, індыйскі бок адкрыта заяўляе аб імкненні да сяброўства і развіцця гандлёва-эканамічных сувязей.
— На дадзены момант, на мой погляд, мы недастаткова прасунуліся ў гэтым кірунку. Для Індыі мы не з’яўляемся буйным рынкам, але гэта перспектыўны кірунак, у той час як для нас Індыя ўяўляе сабой вялізны рынак. Падчас абмену сувенірамі спадар пасол Ашок Кумар заўважыў, што 5% насельніцтва Індыі — гэта вельмі багатыя людзі, якія цэняць прадметы раскошы. 5% насельніцтва Індыі складаюць каля 70 мільёнаў чалавек. Нават калі разглядаць гэта як метафару, уявіце, што наш шклозавод «Нёман» змог бы атрымаць заказы на такую колькасць прадукцыі — гэта значна ажывіла б эканоміку рэгіёну, — расказаў Юрый Караеў.
Ашок Кумар прапанаваў актывізаваць прасоўванне розных сфер, у тым ліку турызм. На яго думку, індыйскім турыстам у нас вельмі спадабалася б, але рэкламная кампанія пакуль недастаткова эфектыўная. Пасол падкрэсліў, што іх задача — прасоўваць Гродзенскую вобласць праз пасольства ў Індыі. Яны плануюць паказваць прэзентацыйныя і мастацкія фільмы, каб лепш пазнаёміць абодва бакі з менталітэтам і культурай адзін аднаго.
— Гродна — гэта горад з багатай гісторыяй. Тут жывуць вельмі ветлівыя людзі, і я адчуў гэта за тыя два дні, якія правёў тут. Мая задача — умацаваць палітычныя, гандлёвыя, эканамічныя і адукацыйныя сувязі паміж Гродзенскай вобласцю і Індыяй. Я знаходжуся ў Беларусі ўжо шэсць месяцаў і наведаў тры рэгіёны, акрамя Гродзенскай вобласці. Гэта частка майго азнаямленчага тура па абласцях Беларусі, — адзначыў пасол. — Сустрэча з паважаным губернатарам Гродзенскай вобласці спадаром Юрыем Караевым была вельмі прадуктыўнай. На сустрэчы таксама прысутнічалі мэр Гродна і іншыя прадстаўнікі ўлады. Мы сапраўды абмеркавалі шмат напрамкаў для супрацоўніцтва паміж Індыяй і Беларуссю. Напрыклад, турызм з’яўляецца важнай сферай, і мы гэта таксама абгаварылі. Акрамя таго, у нас ёсць вялікі патэнцыял для развіцця дзелавых адносін.
Праграма візіту была поўная падзей. У Гродне ён сустрэўся з кіраўнікамі Адміністрацыі СЭЗ «Гроднаінвест» і прадстаўнікамі бізнесу ў Гродзенскім аддзяленні БелГПП. Затым ён наведаў гандлёва-выставачны цэнтр «ЗОВ», дзе ўбачыў працу мясцовых вытворцаў. Асаблівую ўвагу пасол удзяліў сферы адукацыі і навукі. Ён пабываў у Гродзенскім дзяржаўным медыцынскім універсітэце, паразмаўляў з выкладчыкамі і студэнтамі. Таксама ён наведаў адно з найбуйнейшых прамысловых прадпрыемстваў рэгіёну — ААТ «Гродна Азот».
Вераніка Казлоўская
Фота БелТА
