У час выступлення Максім Рыжанкоў абазначыў прапановы Беларусі па далейшым удасканаленні арганізацыі. У першую чаргу ён выказаўся за павышэнне эфектыўнасці дзейнасці ШАС і яе структур.

«На новым рубяжы арганізацыі неабходны больш смелыя рашэнні і комплексныя падыходы. ШАС павінна пазіцыянаваць сябе не проста як форум для абмену меркаваннямі, але перш за ўсё як эфектыўная пляцоўка для пошуку шляхоў рэагавання на глабальныя выклікі і пагрозы, а таксама спосабаў аказання рэальнай падтрымкі краінам, якія ўвайшлі ў крызісны перыяд, — падкрэсліў міністр. — Нашы некаторыя адрозненні ў падыходах да работы і ацэнках падзей у свеце не павінны перашкаджаць фарміраванню прымальных для ўсіх бакоў пазіцый у пытаннях папярэджання пагроз рэгіянальнай бяспецы, аператыўнага абмену інфармацыяй, умацавання профільнага супрацоўніцтва ў рамках ШАС».

На думку беларускага боку, важна завяршыць работу па стварэнні Банка развіцця ШАС, які задумваецца як магутны недыскрымінацыйны фінансавы інструмент арганізацыі.

«Сёння відавочна патрэбнасць у незалежным механізме, здольным у бесперабойным рэжыме фінансаваць трансгранічныя праекты ва ўсіх дзяржавах — членах арганізацыі, нівеліруючы аднабаковы націск з боку асобных дзяржаў па-за нашай арганізацыяй, стымуляваць разлікі ў нацыянальных валютах», — адзначыў кіраўнік МЗС.

Максім Рыжанкоў лічыць неабходным паскорыць пачатак функцыянавання Антынаркатычнага цэнтра ШАС і Універсальнага цэнтра па процідзеянні выклікам і пагрозам бяспецы, развіваць практыку сумесных выступленняў ад імя ШАС на міжнародных пляцоўках.

«Хутчэйшы пачатак функцыянавання Антынаркатычнага цэнтра ШАС і Універсальнага цэнтра па процідзеянні выклікам і пагрозам бяспецы дзяржаў — членаў ШАС дасць магчымасць дасягнуць значных вынікаў у пытаннях процідзеяння транснацыянальнай злачыннасці і выключэння дэстабілізацыі абстаноўкі ў рэгіёне. З улікам геапалітычнай сітуацыі ў свеце гэта задача ўяўляецца сёння найбольш важнай», — заявіў ён.

Міністр падкрэсліў, што Беларусь гатова да самага актыўнага ўдзелу ў сумеснай рабоце па павышэнні эфектыўнасці арганізацыі, захаванні інстытуцыянальнай памяці і мадэрнізацыі дагаворна-прававой базы ў яе рамках.

«Наш агульны абавязак — захаваць нашу арганізацыю сапраўднай платформай супрацоўніцтва, дзе намаганні кожнай дзяржавы накіраваны на ўмацаванне міру і бяспекі, забеспячэнне тэхналагічнага прагрэсу і ўстойлівага эканамічнага развіцця», — рэзюмаваў Максім Рыжанкоў.

Па выніках пасяджэння кіраўнікі знешнепалітычных ведамстваў прынялі сумесную заяву і падпісалі некалькі рашэнняў, якія датычацца падрыхтоўкі маючага адбыцца пасяджэння Савета кіраўнікоў дзяржаў — членаў ШАС і бягучых пытанняў дзейнасці арганізацыі.

Кіраўнікі дэлегацый таксама прынялі ўдзел у цырымоніі сумеснага напісання карціны, на якой адлюстравана дрэва з дзесяццю стваламі, якое сімвалізуе цесныя сувязі паміж дзевяццю дзяржавамі — членамі ШАС, а таксама яе Сакратарыятам.