У вёсцы пад Барысавам разгарэўся незвычайны канфлікт, які скончыўся запячатанымі ўваходнымі дзвярыма. Пра гэта расказалі ва УУС Мінаблвыканкама.

Усё пачалося з таго, што 65-гадовая мясцовая жыхарка звярнулася ў міліцыю з заявай на сваю суседку за абразу.

Аднак на гэтым гісторыя не скончылася. Апошняя расказала пра здарэнне свайму брату, які пражывае ў райцэнтры. Той, нядоўга думаючы, паехаў у вёску і прыдумаў план помсты.

Мужчына падгаварыў аднаго з вяскоўцаў. Даў яму балон мантажнай пены і Br50 «за работу». Ад саўдзельніка патрабавалася замураваць дзверы скаржніцы.

Познім вечарам 25-гадовы мясцовы жыхар выканаў «заказ», пасля чаго ўцёк з месца злачынства.

Але праваахоўнікі хутка затрымалі падазраваных.

У выніку распачата крымінальная справа па факце хуліганства.