Удзел у аглядных нарадах дагаворных бакоў з’яўляецца часткай міжнародных абавязацельстваў краіны ў галіне ядзернай і радыяцыйнай бяспекі. У склад беларускай дэлегацыі для ўдзелу ў мерапрыемстве ўвайшлі прадстаўнікі Дзяржатамнагляду, Дэпартамента па ядзернай энергетыцы Міністэрства энергетыкі, ДВА «Белэнерга», ДП «Беларуская АЭС», Аб’яднанага інстытута энергетычных і ядзерных даследаванняў — «Сосны» НАН Беларусі і Міністэрства замежных спраў. Узначальвае дэлегацыю намеснік начальніка Дзяржатамнагляду Рыгор Асташка.

У ходзе 10-й агляднай нарады беларуская дэлегацыя прыме ўдзел у пленарных пасяджэннях і рабоце краінавых груп, на пасяджэннях якіх дагаворныя бакі будуць прадстаўляць і абмяркоўваць нацыянальныя даклады аб выкананні канвенцыі. Абмеркаванне беларускага нацыянальнага даклада адбудзецца 15 красавіка.

Удзелу беларускай дэлегацыі ў 10-й агляднай нарадзе бакоў канвенцыі папярэднічала маштабная падрыхтоўчая работа. У 2025 годзе быў падрыхтаваны 10-ы нацыянальны даклад Беларусі аб выкананні Канвенцыі аб ядзернай бяспецы і размешчаны ў адкрытым доступе на інтэрнэт-рэсурсе Дзяржатамнагляду. Нацыянальны даклад быў перакладзены на англійскую мову і загружаны на спецыяльную платформу канвенцыі з аўтарызаваным доступам. У мінулым годзе Беларусь таксама вывучыла нацыянальныя даклады 29 краін і міжнародных арганізацый і задала да іх 213 пытанняў. У сваю чаргу да нацыянальнага даклада Беларусі паступіла 163 пытанні ад 20 краін і міжнародных арганізацый, адказы на якія былі падрыхтаваны і размешчаны на платформе з аўтарызаваным доступам.

Канвенцыя аб ядзернай бяспецы ўступіла ў сілу у 1996 годзе і накіравана на тое, каб абавязаць дагаворныя бакі, якія эксплуатуюць наземныя грамадзянскія атамныя электрастанцыі, падтрымліваць высокі ўзровень бяспекі шляхам устанаўлення асноўных прынцыпаў бяспекі. Беларусь ратыфікавала Канвенцыю аб ядзернай бяспецы ў 1998 годзе. У рамках канвенцыі краіны-ўдзельніцы адзін раз у тры гады ажыццяўляюць падрыхтоўку нацыянальных дакладаў аб выкананні абавязацельстваў, вывучаюць у рэжыме аддаленага доступу нацыянальныя даклады іншых краін і фарміруюць пытанні да іх, забяспечваюць падрыхтоўку адказаў на пытанні, якія паступілі да нацыянальных дакладаў, удзельнічаюць у аглядных нарадах дагаворных бакоў у штаб-кватэры МАГАТЭ, арганізуюць рэалізацыю ў краіне рэкамендацый, атрыманых на аглядных нарадах.