Вялікае святочнае і ўрачыстае мерапрыемства штогод адзначаюць у другую нядзелю мая. Гэтае свята ўстаноўлена ўказам Прэзідэнта № 157 ад 26 сакавіка 1998 года. І сёння, у гэты святочны дзень, больш за пяць тысяч чалавек сабраліся на сталічнай плошчы Дзяржаўнага сцяга, каб далучыцца да ўрачыстага рытуалу ўшанавання дзяржаўных сімвалаў Беларусі. У святочным мерапрыемстве ўзялі ўдзел Прэм’ер-міністр Аляксандр Турчын, кіраўнікі міністэрстваў і ведамстваў, прадстаўнікі прадпрыемстваў, партый, моладзь. «Звязда» таксама далучылася да масавага святкавання. 

«Адно з самых важных святаў нашай краіны»

Дзяржаўны сцяг, Дзяржаўны герб і Дзяржаўны гімн Рэспублікі Беларусь з’яўляюцца сімваламі нашай краіны як суверэннай дзяржавы. Кожная сучасная дзяржава мае свае сімвалы, якія выказваюць яе палітычную самастойнасць і незалежнасць. Дзяржаўныя сімвалы падкрэсліваюць нацыянальны дух і годнасць беларускіх грамадзян.

Старт урачыстаму мерапрыемству даў Прэм’ер-міністр Беларусі Аляксандр Турчын. Ён павіншаваў суайчыннікаў з Днём Дзяржаўнага сцяга, Дзяржаўнага герба і Дзяржаўнага гімна: «Хачу ўсіх павіншаваць з адным з самых важных святаў нашай краіны. Усім нам жадаю міру, дабрабыту і працвітання нашай любімай Беларусі». 

Прэм’ер-міністр таксама абвясціў віншавальны зварот Прэзідэнта Беларусі Аляксандра Лукашэнкі. 

Дзяржаўныя сімвалы — гэта атрыбут незалежнасці Беларусі. Пра гэта заявіў намеснік прэм’ер-міністра Уладзімір Каранік: «Дзяржаўныя сімвалы — гэта тое, што нас аб’ядноўвае. Гэта прыкмета дзяржаўнасці, атрыбут незалежнасці. Мы ў першую чаргу маладому пакаленню павінны прывіваць гонар за сваю краіну, за свае сімвалы, каб кожны раз яны імкнуліся рабіць усё, каб праславіць сваю краіну. Таксама гэта важна і для таго, каб мы назіралі нашы дзяржаўныя сімвалы трапяткімі над міжнароднымі спартыўнымі арэнамі, каб яны асацыяваліся з навуковымі дасягненнямі, дасягненнямі культуры, каб фактычна мы праслаўлялі сваю краіну на ўсіх узроўнях. Неабходна, каб дзяржсімвалы ў кожнага беларуса выклікалі гонар». 

На такіх мерапрыемствах шмат моладзі адзначае, што ім гэта цікава.

«Гэта таксама сведчыць аб тым, што мы сталі больш звяртаць увагі на патрыятычнае выхаванне моладзі, а яшчэ тое, што ў нас моладзь вельмі разумная, вельмі таленавітая, — падкрэсліў Уладзімір Каранік. — Яны зрабілі правільныя высновы і сваім удзелам галасуюць за мір, стабільнасць і развіццё».

«Тое, што робіць нас беларусамі»

Дзяржаўная сімволіка — гэта тое, што робіць нас беларусамі, падзялілася меркаваннем намеснік кіраўніка Адміністрацыі Прэзідэнта Вольга Чупрыс: «30 гадоў таму мы на рэферэндуме прынялі найважнейшае рашэнне ў нашым жыцці. Рашэнне, якія дзяржаўныя сімвалы будуць суправаджаць нашу гісторыю і нашу дзяржаву. Гэта тыя сімвалы, якія мы ўшаноўваем сёння. Яны кажуць пра тое, што мы адзіны народ, што ў нас ёсць свая гісторыя, традыцыі, культура, што мы самабытныя і гатовыя жыць у міры і згодзе». 

Колеры дзяржаўнага сцяга, сімволіка, замацаваная ў гербе, гімн — гэта ўсё тое, што робіць нас беларусамі, падкрэсліла намеснік кіраўніка Адміністрацыі Прэзідэнта: «Гэта ўсё тое, што робіць нас накіраванымі ў будучыню. Тое, што мы можам перадаць сваім дзецям і можам ганарыцца нашымі дасягненнямі. Шчыра кажучы, усе нарматыўныя акты, якія ў апошні час мы прымаем, якія датычацца ідэалогіі і будучыні, адлюстроўваюць наша шчырае пачуццё любові да Радзімы, пачуццё патрыятызму, прыхільнасці нашай гісторыі і нашай самабытнасці. Гэта тое, на што мы раўняемся». 

Згуртаванасць вакол дзяржсімвалаў даказвае, што беларусы — маналітная нацыя, расказаў журналістам намеснік кіраўніка Адміністрацыі Прэзідэнта Уладзімір Пярцоў: «Ушанаванне дзяржаўных сімвалаў не толькі на дзяржаўным узроўні, але і ў сем’ях, кажа пра ўздым патрыятызму. Гэта сведчыць аб згуртаванні нацыі ў такі няпросты перыяд. Не будзем у гэты святочны дзень паўтараць пра пагрозы. Мы ўсе разумеем, што яны ёсць. І толькі згуртаванасць вакол нацыянальных сімвалаў, вакол нашага нацыянальнага лідара паказвае ворагам, што мы — адзіная, маналітная нацыя. Мы — адзіны, моцны, згуртаваны народ». 

«Дзяржаўныя сімвалы даюць магчымасць атаясамліваць нашу дзяржаву на міжнародным узроўні і гуртаваць наш народ»

Як адзначыў старшыня Канстытуцыйнага Суда Пётр Міклашэвіч, дзякуючы дзяржаўным сімвалам народ Беларусі становіцца больш згуртаваным: «Дзяржаўныя сімвалы даюць магчымасць атаясамліваць нашу дзяржаву на міжнародным узроўні і гуртаваць наш народ. Дзякуючы ім мы заўсёды адчуваем за сабой нашу вялікую Радзіму — Рэспубліку Беларусь. Мы ганарымся, што гэтае свята ў нас устаноўленае на дзяржаўным узроўні». Ён падкрэсліў, што беларусам неабходна шанаваць і беражліва захоўваць дзяржаўныя сімвалы.

Беларусы беражліва захоўваюць сувязь пакаленняў, працягваюць традыцыі нашых продкаў, ганарацца сваёй гісторыяй. Ужо 30 гадоў дзяржаўныя сімвалы з’яўляюцца сімваламі працоўных, спартыўных, творчых перамог у гісторыі суверэннай Беларусі. Дзяржаўны сцяг, Дзяржаўны герб і Дзяржаўны гімн Рэспублікі Беларусь — сімвалы адзінства народа, якія мы абавязаны захоўваць, каб зберагчы сваю краіну. 

Пра значэнне дзяржаўных сімвалаў і сілу адзінства расказаў старшыня Мінскага гарадскога Савета дэпутатаў Арцём Цуран: «Сімвалічна, што мы пачынаем гэтую акцыю менавіта з месца, дзе літаральна два дні таму адгрымеў салют. Дзе мы былі сведкамі грандыёзнага параду ў гонар 80-годдзя Перамогі». 

Кіраўнік дэпутацкага корпуса сталіцы адзначыў, што такія падзеі — гэта не проста святочная традыцыя. Гэта частка вялікага і глыбокага сэнсу. «Гэта ўсё па вялікім рахунку складнікі сілы адзінства нашага народа і нашай краіны. Тое, што мы адзначаем свята з такім размахам — яшчэ адзін доказ таго, што наша грамадства згуртаванае», — сказаў Арцём Цуран. 

У Дзень Дзяржаўнага сцяга, Дзяржаўнага герба і Дзяржаўнага гімна ад імя маладога пакалення Беларусі клятву вернасці дзяржаўным сімвалам вымавілі прадстаўнікі моладзі з усіх рэгіёнаў краіны і горада Мінска. Маладыя людзі пакляліся быць годнымі грамадзянамі краіны, берагчы мір і спакой на беларускай зямлі, абараняць яе таксама годна, як і нашы прадзеды ў гады Вялікай Айчыннай вайны. 

«Уражанне на ўсё жыццё»

У рамках ушанавання дзяржаўных сімвалаў на вуліцах сталіцы разгарнулася ўражлівае палатно Дзяржаўнага сцяга Рэспублікі Беларусь даўжынёй 500 метраў, 9 метраў шырынёй і вагой больш за 400 кілаграмаў! Яго пранеслі па праспекце Пераможцаў прадстаўнікі рэспубліканскіх грамадскіх арганізацый. Усе яны прыйшлі з адной мэтай: выказаць сваю падтрымку дзяржаўным сімвалам, якія ўвасабляюць нашу ідэнтычнасць.

Дарэчы, у шэсці з самым вялікім Дзяржаўным сцягам Беларусі ўзялі ўдзел не толькі нашы суачыннікі, але і замежныя госці. Сярод іх — сям’я Паўлавых з Расіі. Маладыя людзі падзяліліся з намі сваімі ўражаннямі.

«Цалкам выпадкова трапілі на шэсце са сцягам. Ужо другі раз удзельнічаем у святкаванні дня дзяржаўных сімвалаў Беларусі. Першы раз былі ў 2022 годзе. Мы не ведалі, што ён святкуецца ў другую нядзелю мая, думалі, ёсць пэўная дата. Сёння мы разам з іншымі людзьмі неслі Дзяржаўны сцяг Беларусі. Гэта ўражанне на ўсё жыццё», — адзначыла Вера Паўлава.

У мерапрыемстве яна ўдзельнічала разам з мужам і дачкой. Жанчына дадала, што іх сям’я два-тры разы на год прыязджае ў Беларусь, а ў яе мужа Мікалая фактычна ўся радня з нашай краіны.

Данііл ХМЯЛЬНІЦКІ

Фота Віктара ІВАНЧЫКАВА