Грамадска-палітычная газета Узбекістана «Хурсіт» надрукавала нарыс Кучкара Наркабіла «Горад, на які звалілася неба», прысвечаны стойкасці і мужнасці мінчан у 1941 годзе, у наступныя гады акупацыі беларускай сталіцы нямецка-фашысцкімі захопнікамі. Расказвае пісьменнік і пра тое, як ушаноўваецца памяць пра Вялікую Айчынную вайну сённяшнімі беларусамі. 

А ў падручнік роднай мовы для 8-га класа агульнаадукацыйнай школы Узбекістана ўключана эсэ Кучкара Наркабіла «Узбекістан жыве ў гэтым доме» — пра Літаратурна-мемарыяльны музей Якуба Коласа ў Мінску. Расказвае ўзбекскі літаратар: «Мне прыемна, што нашу сістэму адукацыі, педагогаў зацікавіў мой мастацка-публіцыстычны тэкст. Я шмат чытаў, ведаю ад пісьменнікаў папярэдняга пакалення пра тое, як Ташкент у Вялікую Айчынную вайну стаў прытулкам для сям’і народнага песняра Беларусі, як Якуб Колас парадніўся ў той драматычны перыяд з ташкентцамі, узбекістанцамі, колькі твораў напісаў пра наш край. І мне захацелася даведацца, як жа гэты адрэзак жыцця і творчасці легендарнага пісьменніка раскрываецца, асвятляецца ў Мінску, у яго роднай старонцы. І, пабываўшы ў музеі, пазнаёміўшыся з нашчадкамі паэта, быў уражаны. Сваімі эмоцыямі і адкрыццямі падзяліўся ў эсэ пра Коласаўскі музей...»

Беларуска-ўзбекскае гуманітарнае, літаратурнае супрацоўніцтва набывае ўсё болей шырокія абсягі. І гэта адбываецца дзякуючы руплівасці такіх псіьменнікаў, публіцыстаў, перакладчыкаў, як Кучкар Наркабіл, Рысалат Хайдарава, Сіражыддзін Саід. 

Мікола Берлеж