Беларусь і Растоўская вобласць плануюць нарошчваць кааперацыю. Аб гэтым заявіў кіраўнік Адміністрацыі Прэзідэнта Дзмітрый Крутой ў час сустрэчы з губернатарам Растоўскай вобласці Юрыем Слюсарам, перадае БелТА.
Кіраўніком дзяржавы пастаўлена задача дасягнуць тавараабароту з Растоўскай вобласцю $1 млрд. «У нас і цяпер лічбы вельмі высокія, да мэты засталося быццам бы не так ужо і шмат. Але ключавыя галіны і сферы, дзе мы супрацоўнічаем, цяпер перажываюць даволі складаны час, звязаны з сітуацыяй на рынках. У першую чаргу гэта датычыцца машынабудаўнічай прадукцыі. Адпраўляючы да вас з візітам, беларускі лідар сказаў: паспрабуйце, акрамя гандлёвага блока (ён развіваецца нядрэнна), знайсці дадатковыя кааперацыйныя праекты», — сказаў Дзмітрый Крутой.
- У прыватнасці, кіраўнік Адміністрацыі Прэзідэнта бачыць перспектывы кааперацыі ў галіне верталёта- і самалётабудавання. «У нас ужо ёсць парасткі кааперацыі па сельгасмашынабудаванні „Сальсксельмаша“ і МТЗ. Асобна з Прэзідэнтам абмяркоўвалі станкабудаванне як базавы аспект для ўстойлівага развіцця прамысловага комплексу і імпартанезалежнасці. Сёння наведвалі „Растсельмаш“, больш за 50 беларускіх прадпрыемстваў уцягнуты ў кааперацыю з ім. Ведаем вашы амбіцыйныя планы па мадэрнізацыі парку пасажырскай тэхнікі рэгіёну. Мы ва ўсіх праграмах гатовы ўдзельнічаць. Па кожным напрамку ў нас шматгадовыя ўстойлівыя даверныя сувязі і супрацоўніцтва. Лагістычныя праблемы, якія зараз існуюць, могуць быць у бліжэйшыя месяцы вырашаны з адкрыццём аэрапорта — гэта яшчэ адзін штуршок для бізнесу», — падкрэсліў ён.
Ёсць перспектывы для супрацоўніцтва ў сферы сістэм водазабеспячэння, перапрацоўкі адходаў. «Усе нашы кампаніі гатовы ўзаемадзейнічаць. Ёсць пілотныя праекты. У Краснадарскім краі мы ўжо больш маштабна працуем, але там таксама пачыналася ўсё з невялікіх аб’ектаў, з праектавання, а цяпер гэта комплексныя рашэнні пад ключ, якімі задаволены калегі. Гэтыя рашэнні канкурэнтныя па цане і забяспечваюць высокую якасць», — зрабіў акцэнт Дзмітрый Крутой.
Развіваецца гуманітарнае супрацоўніцтва, падпісаны пагадненні паміж ВНУ. «Гэты напрамак таксама трэба развіваць, таму што патрэбнасць у навуковым і адукацыйным узаемадзеянні — адна з ключавых», — дадаў кіраўнік Адміністрацыі Прэзідэнта.
Удзяляецца ўвага і культурнаму складніку супрацоўніцтва. Два гады таму ў Мінску з вялікім поспехам прайшлі Дні культуры Растоўскай вобласці. Магчыма, будзе прынятае рашэнне зноў правесці гэту падзею.
Нядаўна дэлегацыя Растоўскай вобласці пабывала з візітам у Беларусі. «У захапленні знаходзімся ад гэтага візіту, ад наведвання Мінска. Ёсць чаму павучыцца — і чысціня, і размяшчэнне сацыяльных аб’ектаў. Была вельмі вялікая павестка візіту, мы яе абмеркавалі ў Мінску з удзелам Прэзідэнта», — адзначыў Юрый Слюсар.
27 лістапада беларуская дэлегацыя наведвала Растоўскую вобласць. «У нас знакавая падзея — адкрываем мультыбрэндавы цэнтр беларускай тэхнікі. Гэта цэнтр кампетэнцый па прасоўванні запатрабаванасці беларускай тэхнікі, вельмі якаснай і канкурэнтаздольнай, у нас у Растоўскай вобласці. Цэнтр забяспечыць патрэбнасці растоўскіх прадпрыемстваў у камунальнай, будаўнічай і іншай тэхніцы, грамадскім транспарце, гарантуе падтрыманне спраўнасці, добрага стану тэхнікі, своечасовую замену запасных частак, навучанне. Спадзяёмся, што цэнтр стане вузлавым не толькі для нашай вобласці, але і для іншых рэгіёнаў. Плюсаў шмат, вельмі рады, што такі цэнтр адчыняецца менавіта на тэрыторыі Растоўскай вобласці», — адзначыў Юрый Слюсар.
