У Савеце Рэспублікі адбылася сустрэча з часовым павераным у справах Катара ў Беларусі Хамудам Салехам Аль-Саадзі. На ёй бакі абмеркавалі перспектывы правядзення ў найбліжэйшы час чарговага пасяджэння сумеснага камітэта, на якім будзе разгледжана дарожная карта супрацоўніцтва.

На працягу многіх гадоў Беларусь і Катар звязваюць добрыя і сяброўскія адносіны, і гэта шмат у чым дзякуючы лідарам нашых краін, заявіла падчас сустрэчы Старшыня Савета Рэспублікі Наталля Качанава. Узаемная падтрымка Катара і Беларусі на міжнародным узроўні, паводле яе слоў, — гэта тое, што сёння вызначае работу дзяржорганаў і нашых краін у цэлым. «Перш за ўсё, вядома, мы гатовы да канструктыўнага супрацоўніцтва па міжпарламенцкай лініі», — падкрэсліла Наталля Качанава. Спікер Савета Рэспублікі адзначыла, што разлічвае на падтрымку і садзейнічанне часовага паверанага ў справах дзяржавы Катар у Рэспубліцы Беларусь Хамуда Салеха Аль-Саадзі ў арганізацыі афіцыйнага візіту ў нашу краіну спікера Кансультатыўнага сходу Катара.

«Патэнцыял у нашым міжпарламенцкім супрацоўніцтве вельмі сур’ёзны, — акцэнтавала Старшыня Савета Рэспублікі. — І нам трэба зрабіць яго такім жа эфектыўным, якім ён складваецца паміж дзяржорганамі і ўрадамі». 

Паводле яе слоў, падпісанне ў перспектыве дарожнай карты і рэалізацыя ўсіх дамоўленасцяў дазволіць бакам больш эфектыўна выбудоўваць адносіны ў эканоміцы, бо гандлёва-эканамічны кірунак з’яўляецца прыярытэтным у развіцці міждзяржаўных адносін.

У сваю чаргу старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік указаў на тое, што сустрэча праходзіць у сімвалічную дату ў гісторыі двухбаковых адносін паміж краінамі. «30 гадоў таму быў падпісаны пратаколаб устанаўленні дыпламатычных адносін паміж Беларуссю 

і Катарам, — нагадаў ён. — За 30 гадоў нам удалося выбудаваць сапраўды вельмі добрыя, сяброўскія, даверныя адносіны, якія грунтуюцца на ўзаемнай павазе. Прэзідэнт нашай краіны наведваў з афіцыйнымі візітамі Катар. Былі і візіты ў адказ Эміра Катара ў нашу краіну. Выбудаваная работа на ўзроўні ўрадаў, галіновых міністэрстваў і ведамстваў, створаны сумесны камітэт двухбаковага супрацоўніцтва».

Гаворачы аб дарожнай карце супрацоўніцтва, старшыня Пастаяннай камісіі падкрэсліў, што яна ўключае ў сябе многія кірункі. «Перш за ўсё наша гандлёва-эканамічнае, інвестыцыйнае ўзаемадзеянне, супрацоўніцтва ў сацыяльна-гуманітарнай сферы, развіццё турызму, — канкрэтызаваў Сяргей Алейнік. — Разлічваем, што гэты дакумент будзе ў найбліжэйшы час узгоднены, падпісаны і надасць новы імпульс рэалізацыі вялікага патэнцыялу, які існуе паміж нашымі краінамі».

Сенатар таксама адзначыў, што падчас сустрэчы разглядаліся пытанні развіцця міжпарламенцкага супрацоўніцтва. «У нас устаноўлены кантакты з парламентам Катара. Мы накіравалі афіцыйнае запрашэнне спікеру заканадаўчага органа Катара наведаць нашу краіну з афіцыйным візітам. Разлічваем, што такі візіт можа адбыцца ў гэтым годзе, — выказаў упэўненасць ён. — Мы таксама гаварылі аб неабходнасці ўзаемадзеяння на ўзроўні профільных камісій, камітэтаў, каб аказваць садзейнічанне ў рэалізацыі тых задач, якія стаяць на міжурадавым узроўні».

У сваю чаргу часовы павераны ў справах Катара ў Беларусі Хамуд Салех Аль-Саадзі ўдзяліў пытанню развіцця турызму асаблівую ўвагу. Ён падзяліўся ўражаннямі ад Беларусі, адзначыў вельмі высокі ўзровень прагрэсу, бяспекі і чалавечага развіцця, заявіў, што будзе ўсяляк садзейнічаць турыстычнаму супрацоўніцтву паміж нашымі краінамі.

Данііл ХМЯЛЬНІЦКІ