Паводле прагнозу Белгідрамета, 1 і 2 лютага ў начныя і ранішнія гадзіны на большай частцы тэрыторыі краіны тэмпература паветра складзе 25-30 градусаў марозу, 2 лютага — месцамі да мінус 33 градусаў. Аб'яўлены аранжавы ўзровень небяспекі.

У Міністэрстве энергетыкі 30 студзеня адбылося пасяджэнне камісіі па надзвычайных сітуацыях. Яно прайшло ў рамках выканання даручэнняў Кіраўніка дзяржавы з акцэнтам на своечасовую падрыхтоўку і работу на апярэджанне ва ўмовах прагназаванага паніжэння тэмпературы вонкавага паветра. «У ходзе пасяджэння мы дэталёва разгледзелі гатоўнасць энергасістэмы краіны да работы ва ўмовах моцных маразоў. Кіраўнікі вытворчых аб’яднанняў, энерга- і газазабеспячальных арганізацый далажылі аб бягучай абстаноўцы і прыманых мерах. Па выніках нарады прынята рашэнне аб пераводзе прадпрыемстваў галіны на ўзмоцнены рэжым работы з забеспячэннем пастаяннай гатоўнасці аварыйных брыгад і аператыўнага рэагавання на магчымыя няштатныя сітуацыі. Перасоўныя дызельныя электрастанцыі прыведзеныя ў гатоўнасць да аператыўнай перакідкі ў любы пункт краіны пры неабходнасці», — сказаў Сяргей Адаменка.

Для забеспячэння надзейнасці электразабеспячэння спажыўцоў, аператыўнага правядзення аварыйна-аднаўленчых работ падрыхтаваны 673 укамплектаваныя брыгады, 134 з якіх падрыхтаваны для магчымага накіравання ў сумежныя энергасістэмы. У месцах прыбыцця брыгад вызначаны парадак арганізацыі забеспячэння іх харчавання і пражывання. Забяспечана гатоўнасць спецыяльнай тэхнікі ў колькасці 728 штук, 151 з якіх падрыхтавана для магчымага накіравання ў сумежныя энергасістэмы. Праведзена праверка працаздольнасці і гатоўнасці да транспарціроўкі 298 дызельных генератарных установак, 128 з якіх падрыхтаваны для магчымага накіравання ў сумежныя энергасістэмы.

Асобная ўвага нададзена рабоце цеплавых сетак. Іх рэжымы карэкціруюцца з улікам тэмпературы вонкавага паветра. У населеных пунктах, дзе прагназуецца далейшае пахаладанне, забяспечваецца плаўнае і апераджальнае рэгуляванне падачы цяпла, каб пазбегнуць рэзкіх перападаў і забяспечыць камфортныя ўмовы для насельніцтва. Дадзены даручэнні па аператыўным узаемадзеянні з арганізацыямі ЖКГ пры рэагаванні на абстаноўку, якая складваецца.

«Сітуацыя знаходзіцца на пастаянным кантролі Міністэрства энергетыкі. Усе службы гатовыя да работы ў складаных умовах надвор’я», — падкрэсліў намеснік міністра.