У Магілёве прайшло пасяджэнне савета абласной арганізацыі АСВОДа, дзе падвялі вынікі работы за мінулы перыяд і вызначылі задачы на 2026 год.

Старшыня абласной арганізацыі Канстанцін Іваноў адзначыў станоўчую дынаміку ў забеспячэнні бяспекі на вадзе. У рэгіёне назіраецца штогадовае зніжэнне колькасці ўтапленняў. «Калі ў 2021 годзе пры розных абставінах загінула 77 чалавек, то ў 2025-м — 34. Статыстыка паказвае, што 45 % выпадкаў звязаныя з падзеннем у ваду, 25 % — з купаннем, 6 % — з рыбнай лоўляй», — сказаў ён.

Для аператыўнага аказання дапамогі выратавальныя аб’екты цалкам укамплектаваныя. За пяць гадоў створана 19 сезонных пастоў. У 2026 годзе плануецца стварыць яшчэ шэсць.

Дзякуючы падтрымцы аблвыканкама істотна абноўлена матэрыяльна-тэхнічная база. Закуплены тры аэралодкі, маторныя лодкі, больш за 50 вадалазных касцюмаў, аквалангі і абсталяванне для МПГ. Праведзена мадэрнізацыя Дняпроўскай, Грэбенеўскай, Пячэрскай і Бабруйскай выратавальных станцый.

За два гады праведзена больш за 3 тыс. рэйдаў. У 2025 годзе выратаваны 21 чалавек. «Наша мэта — данесці правілы бяспекі да кожнага, выкарыстоўваючы сучасныя фарматы: ад экскурсій да практычных заняткаў. Мы прыкладаем усе намаганні, каб звесці статыстыку гібелі да нуля», — падзяліўся спецыяліст па сувязях з грамадскасцю і СМІ Магілёўскай абласной арганізацыі АСВОДа Яўген Сіндзюкоў.

Таксама начальнік вадалазна-выратавальнай службы Сяргей Казачэнка расказаў пра геаграфію пашырэння сеткі пастоў. Ён адзначыў, што новыя пункты з’явяцца ў Магілёве, Горацкім, Касцюковіцкім, Крычаўскім і Магілёўскім раёнах. Акрамя таго, да пачатку сезона ў абласным цэнтры ўстановяць пяць новых назіральных вышак.

Па выніках пасяджэння Рэспубліканскі савет АСВОД даручыў узмацніць меры па прадухіленні няшчасных выпадкаў. Неабходна дэталёва аналізаваць кожны інцыдэнт, каб не дапусціць паўтарэння трагедый у будучыні.