Музей працуе з 25 студзеня 2011 года. Спачатку наведвальнікі маглі пабываць толькі ў дзвюх залах, дзе быў прадстаўлены мінімум экспанатаў. «За 15 гадоў фонды музея папоўніліся. Мы сабралі больш за 4 тыс. экспанатаў. Было арганізавана 90 выставак, прынята звыш 330 тыс. наведвальнікаў. Праведзена 120 тэатралізаваных рэгістрацый шлюбу. Зараз у нас адкрыты пяць залаў: чатыры экспазіцыйныя і выставачныя. Мы значна змянілі ўнутранае напаўненне кожнай з іх за апошнія тры гады, і на гэтым не спыняемся», — адзначыла Алена Кубарка. Ружанскі палацавы комплекс у 2025 годзе наведалі амаль 45 тыс. турыстаў з розных рэгіёнаў Беларусі, краін блізкага і далёкага замежжа. 

На тэрыторыі палацавага комплексу працягваюцца рэстаўрацыйныя працы. Праводзяцца яны пад археалагічным наглядам. «Падчас зладжанай работы рэстаўратараў і археолагаў былі знойдзены вельмі цікавыя артэфакты XVI-XVII стагоддзяў, якія ўжо сёлета папоўняць калекцыю нашага музея. Гэта фрагменты кафлі з геральдыкай роду Сапегаў, фрагменты керамічнага посуду, манеты, кулі і іншыя прадметы», — пералічыла дырэктар.

Рэстаўрацыя Ружанскага палаца пачалася ў 2008 годзе. З таго часу абноўлены цэнтральныя ўязныя вароты і адноўлены бакавыя флігелі, у якіх створаны музей. Праведзена рэстаўрацыя паўночна-ўсходняй аркады. Завершаны знешнія работы па рэстаўрацыі двухпавярховага Усходняга (тэатральнага) корпуса. Там плануецца размясціць музейнае памяшканне, фондасховішча, шматфункцыянальная зала, гатэль і кафэ. Па праграме «Культурная прастора» ў 2026—2030 гадах аднаўленне архітэктурнай жамчужыны працягнецца.

«За пяцігодку ўсе работы на тэрыторыі палацавага комплексу павінны быць завершаны. Гэта кансервацыя з элементамі рэстаўрацыі фрагментаў галоўнага корпуса і аркад, рэстаўрацыя і прыстасаванне Усходняга корпуса (унутранае аздабленне), добраўпарадкаванне ўнутранага параднага ўваходу», — растлумачыла Алена Кубарка. Фінансаванне будзе паступаць з некалькіх крыніц, у тым ліку з мясцовага і рэспубліканскага бюджэтаў.