У рамках лекцыі ён прадставіў ключавыя кірункі рэалізацыі падыходу «Вучыся і працуй» у 2026 годзе. Ініцыятыва распрацавана для забеспячэння хуткага ўваходу моладзі на рынак працы. Як адзначыў Андрэй Лабовіч, больш за палову студэнтаў старэйшых курсаў ужо сумяшчаюць вучобу з працай, аднак важна, каб гэта праца была па спецыяльнасці. 

На яго думку, «Вучыся і працуй» дазволіць моладзі мякка адаптавацца да прафесійнай дзейнасці, набыць вопыт, атрымліваць больш высокі ўзровень аплаты працы на старце кар’еры (у тым ліку за кошт надбаўкі за стаж). Для наймальнікаў гэта магчымасць укамплектаваць штат падрыхтаванымі кадрамі.

Андрэй Лабовіч падкрэсліў, што праца студэнтаў будзе ажыццяўляцца толькі пад кіраўніцтвам спецыялістаў больш высокай кваліфікацыі або кіраўнікоў і не будзе патрабаваць прыняцця кіраўніцкіх рашэнняў. Гэтыя ўмовы замацуюць у кваліфікацыйных даведніках. Ужо адабрана 85 пасад, па якіх студэнты змогуць працаваць у вольны ад вучобы час: ад сістэмных адміністратараў, бухгалтараў і эканамістаў да аграномаў, бібліятэкараў, спецыялістаў па кадрах і майстроў лесу. Ні адна з гэтых пасад не прадугледжвае спецыяльных умоў допуску або адказнасці за забеспячэнне бяспекі.

У бліжэйшы час будуць сфарміраваны «маршруты» працаўладкавання студэнтаў канкрэтных ВНУ з канкрэтнымі арганізацыямі з улікам месца размяшчэння, каб маладыя людзі маглі працаваць да/пасля вучобы. Да гэтай работы актыўна падключацца БРСМ, маладзёжныя арганізацыі і служба занятасці. 

Асобна Андрэй Лабовіч адзначыў, што дзяржава паступальна ўмацоўвае гарантыі ў сацыяльна-працоўнай сферы. У прыватнасці, растуць грашовыя даходы насельніцтва, захоўваецца пакупніцкая здольнасць выплат, павышаюцца зарплаты бюджэтнікаў, пенсіі і дапамогі. Зніжаецца ўзровень беднасці: за 30 гадоў ён зменшыўся больш чым у 10 разоў.

У завяршэнне профільны міністр падкрэсліў, што дзяржава арыентуецца на ўнутраныя рэзервы і ў першую чаргу — на моладзь. Менавіта маладое пакаленне стане драйверам эканамічнага росту, а ініцыятыва «Вучыся і працуй» — важным крокам для яго падтрымкі.