Як адзначылі ў ведамстве, на працягу некалькіх гадоў у краіне зніжаецца ўзровень падлеткавай злачыннасці: з 1749 выпадкаў у 2019 годзе да 1060 у 2025-м. Такім чынам, колькасць гэтых злачынстваў за названы перыяд зменшылася на 39,3%.

«Асаблівую ўвагу пракуроры звярнулі на павелічэнне колькасці непаўналетніх, якія ўчынілі грамадска небяспечныя дзеянні, у дачыненні да якіх было прынята рашэнне аб адмове ва ўзбуджэнні крымінальнай справы ў сувязі з недасягненнем узросту прыцягнення да крымінальнай адказнасці, — расказалі ў Генеральнай пракуратуры. — Асноўныя ўмовы, якія спрыялі здзяйсненню непаўналетнімі грамадска небяспечных дзеянняў да дасягнення ўзросту крымінальнай адказнасці — невыкананне бацькамі або асобамі, якія іх замяняюць, абавязкаў па выхаванні і ўтрыманні дзяцей; аслаблены кантроль з боку законных прадстаўнікоў за баўленнем часу дзяцей».

Пракуроры ўстанавілі, што ў Гомельскай вобласці ў неспрыяльнай абстаноўцы на момант здзяйснення супрацьпраўных дзеянняў выхоўвалася кожнае дзясятае дзіця, у Гродзенскай вобласці і Мінску — кожнае сёмае, у Віцебскай вобласці — кожнае пятае. «Пры гэтым зафіксаваныя факты, калі праваахоўнікі не накіроўвалі ў органы кіравання адукацыяй звесткі аб неспрыяльнай для дзяцей абстаноўцы. Па гэтай прычыне не заўсёды своечасова праводзіліся сацыяльныя расследаванні, што не дазваляла кампетэнтным службам забяспечыць раннюю прафілактычную работу для ліквідацыі прыкмет сямейнага недабрабыту», — адзначылі ў ведамстве.

Характэрна, што ў краіне найбольш высокую ўдзельную вагу ў структуры грамадска небяспечных дзеянняў (каля 40%) займаюць крадзяжы веласіпедаў і самакатаў, у тым ліку паблізу або з пад’ездаў жылых дамоў, а таксама з тэрыторый устаноў адукацыі. Іх, як правіла, здзяйснялі дзеці ва ўзросце ад 8 да 10 гадоў, якія ў поўнай меры не ўсведамлялі супрацьпраўны характар сваіх дзеянняў. «Напрыклад, у Фрунзенскім раёне Мінска за 6 месяцаў 2026 года 67% учыненых непаўналетнімі супрацьпраўных дзеянняў да дасягнення ўзросту крымінальнай адказнасці звязаныя менавіта з крадзяжом маёмасці, з іх 45% — крадзяжы веласіпедаў і самакатаў, — расказалі ў ведамстве. — Не адзінкавыя выпадкі, калі самі ўласнікі не прымалі дастатковыя меры па захаванасці сваёй маёмасці, што таксама спрыяла здзяйсненню крадзяжоў непаўналетнімі».

Як паказала пракурорская праверка, зацікаўленым органам важна забяспечыць эфектыўнае правядзенне растлумачальнай работы сярод насельніцтва, асаблівую ўвагу надаўшы павышэнню ўзроўню правасвядомасці законных прадстаўнікоў непаўналетніх. Сярод іншага гэта дапаможа дарослым лепш усвядоміць адказнасць за супрацьпраўныя паводзіны іх дзяцей, а таксама захаванасць маёмасці.

Па выніках паверкі намеснік генпракурора накіраваў прадстаўленне ў Міністэрства ўнутраных спраў, у якім запатрабаваў ліквідаваць выяўленыя парушэнні заканадаўства, а таксама прычыны і ўмовы, якія спрыялі ім.