Сведчаннем гэтага стаў і афіцыйны візіт у нашу краіну Прэзідэнта Ісламскай Рэспублікі Іран Масуда Пезешкіяна. 

На парадку дня перагавораў лідараў Беларусі і Ірана ў Палацы Незалежнасці — абмеркаванне шырокага кола пытанняў двухбаковага супрацоўніцтва, планы на будучыню. Перспектывы сапраўды адкрываюцца вялікія: Іран — адна з вядучых эканомік Заходняй Азіі — дэманструе ўстойлівы рост, нягледзячы на знешнія абмежаванні. Краіна лічыцца «энергетычнай звышдзяржавай» — 10 % сусветных даказаных запасаў нафты і 15 % запасаў газу. У апошнія дзесяцігоддзі апераджальнымі тэмпамі развіваецца прамысловасць. Створаны і добры фундамент для супрацоўніцтва — дыпламатычныя адносіны паміж Беларуссю і Іранам устаноўлены ў 1993 годзе. Беларускі лідар тройчы наведваў Іран — у 1998, 2006 і 2023 гадах. У кастрычніку мінулага года прэзідэнты Ірана і Беларусі сустракаліся на палях саміта БРІКС у Казані. 

Сустрэча ў Палацы Незалежнасці стала пунктам адліку новага этапу ў беларуска-іранскіх адносінах. Пачалася яна па пратаколе — урачыста, з удзелам роты ганаровай варты. Аляксандр Лукашэнка асабіста сустрэў госця. І пасля пратакольнай цырымоніі фатаграфавання лідары перайшлі да работы, неабходнасць якой прадыктавана не пратаколам, а жыццём і, найперш, эканамічнымі інтарэсамі Беларусі і Ірана.

Аляксандр Лукашэнка: «Мы не сябруем супраць кагосьці, мы ўсё робім на карысць нашых народаў»

Работу прэзідэнты пачалі з перагавораў у вузкім складзе. Аляксандр Лукашэнка адразу задаў тон сустрэчы, падкрэсліўшы, што ў адносінах Беларусі і Ірана няма закрытых тэм. 

Візіт Прэзідэнта Ірана планаваўся яшчэ ў чэрвені, аднак у сілу непрадбачаных абставін, ён быў перанесены. «Але ён не стаў менш значным, чым тады. Вы былі і застаяцеся нашымі сябрамі. Мы верныя выкананню ўсіх нашых абавязацельстваў, якія ўзялі на сябе перад Іранскай Рэспублікай. Я хачу, каб вы разумелі, што вы прыехалі да сваіх сяброў. І вы павінны адчуваць сябе, як у сваіх сяброў», — адзначыў Аляксандр Лукашэнка. Ён падкрэсліў, што калі і будуць нейкія невыкананні ўмоў і дамоўленасцяў, усё гэта будзе абмеркавана ў адкрытай і сяброўскай гутарцы.

Беларускі лідар прызнаўся, што памятае свае візіты ў Іран, якія, па яго словах, былі напоўнены ветлівасцю. Аляксандр Лукашэнка згадаў, што бываў у гасцях у Вярхоўнага лідара Ірана, і папрасіў перадаць яму самыя цёплыя і сяброўскія пажаданні. 

«Мы гатовыя да абмеркавання любых пытанняў. Закрытых тэм у нас няма. Мы гатовыя з вамі супрацоўнічаць ад забеспячэння харчаваннем насельніцтва вашай краіны да ваенна-тэхнічнага супрацоўніцтва. Яшчэ раз падкрэсліваю, тут няма ніякіх сакрэтаў. Мы не сябруем супраць кагосьці, мы ўсё робім на карысць нашых народаў, іранскага і беларускага», — запэўніў Аляксандр Лукашэнка. 

Масуд Пезешкіян падзякаваў беларускаму калегу за гасціннасць. Ён пагадзіўся, што ў Беларусі і Ірана агульныя пазіцыі і агульныя погляды па многіх пытаннях сусветнага значэння, асабліва на тыя дамоўленасці, якія дасягнуты ў рамках ЕАЭС, БРІКС, ШАС. «Гэта тыя рамкі, праз якія мы можам развіваць і двухбаковыя, і шматбаковыя адносіны, — адзначыў Прэзідэнт Ірана. — Вядома, нашы агульныя погляды павінны ўвасабляцца ў жыццё ў эканамічнай, культурнай сферах, у сферы развіцця турызму паміж нашымі краінамі, а таксама, як вы адзначылі, у развіцці ваенна-тэхнічнага супрацоўніцтва».

Масуд Пезешкіян нагадаў, што Захад ужо больш за 40 гадоў уводзіць розныя абмежавальныя меры супраць Ірана. Беларусь таксама доўгі час знаходзіцца пад заходнімі санкцыямі. Прэзідэнт Ірана лічыць, што такі аднабаковы дэструктыўны падыход з боку ЗША і іх саюзнікаў па ўсім свеце непрымальны.

«І наша, і ваша краіна хочуць застацца незалежнымі. І ў рамках незалежнасці мы можам развіваць наша сяброўства і кааперацыю. Адзінае, што можа нейтралізаваць незаконныя санкцыі, — гэта развіццё нашых адносін і нашы дамоўленасці, якія будуць рэалізаваны на практыцы», — запэўніў іранскі лідар.

Аляксандр Лукашэнка: «Мы толькі ўпэўнена ідзём наперад, а ў цяперашняй сітуацыі трэба не ісці, а бегчы»

Беларусь і Іран вядуць карпатлівую работу, каб ператварыць кожны новы выклік у новую магчымасць. Аб гэтым заявіў Прэзідэнт Беларусі Аляксандр Лукашэнка на перагаворах з Прэзідэнтам Ірана Масудам Пезешкіянам у шырокім складзе. 

Перагаворы прэзідэнтаў у вузкім складзе працягваліся больш за гадзіну. Затым лідары прадоўжылі работу ў шырокім складзе. Вітаючы членаў дэлегацыі, Аляксандр Лукашэнка звярнуў увагу на тое, што візіт іранскай дэлегацыі азначае новы этап у развіцці двухбаковых адносін, умацаванні партнёрства з апорай на ўзаемныя павагу і давер.

«Ва ўмовах геапалітычнай турбулентнасці Мінск і Тэгеран робяць паслядоўныя і ўзважаныя крокі па далейшым развіцці супрацоўніцтва, вядуць карпатлівую работу, каб ператварыць кожны новы выклік у новую магчымасць, — падкрэсліў беларускі лідар. — Як пісаў вялікі філосаф і паэт Амар Хаям, «хто шукае жэмчуг, павінен нырнуць у глыбіню». Пераадольваючы перашкоды, мы гартуем сваю волю, развіваемся і будуем моцныя і незалежныя дзяржавы».

• Аляксандр Лукашэнка нагадаў, што аб прыездзе ў Мінск Прэзідэнта Ірана дамовіліся на сустрэчы восенню 2024-га ў Казані на палях саміту кіраўнікоў дзяржаў БРІКС. «Яшчэ раз хачу выказаць словы ўдзячнасці іранскім сябрам за садзейнічанне ў атрыманні Беларуссю статусу краіны — партнёра гэтага міжнароднага аб’яднання. На яго пляцоўцы, як у Руху недалучэння і ААН, мы маем намер працягваць традыцыі канструктыўнага партнёрства і ўзаемнай падтрымкі. Упэўнены, актывізацыя сумесных намаганняў у рамках міжнародных арганізацый здольная аказаць станоўчы ўплыў на пашырэнне эканамічных сувязяў. Важны кірунак — паляпшэнне транспартнай узаемазвязанасці і развіццё калідора «Поўнач — Поўдзень» пры дапамозе рэсурсу ШАС», — сказаў беларускі лідар. 

Аляксандр Лукашэнка заявіў, што Беларусь вітае ўступленне ў сілу Пагаднення аб свабодным гандлі паміж Еўразійскім эканамічным саюзам і Іранам. «Перакананы, што яно надасць магутны імпульс гандлёва-эканамічнаму супрацоўніцтву паміж нашымі краінамі, створыць дадатковыя магчымасці для пашырэння наменклатуры і павелічэння аб’ёмаў узаемнага гандлю», — адзначыў ён. 

Прэзідэнт адзначыў пазітыўны эфект рэгулярных пасяджэнняў змешанай беларуска-іранскай камісіі па пытаннях эканамічнага супрацоўніцтва. Апошні раз гэты сумесны эканамічны штаб збіраўся ў Мінску ў студзені. «Аднак, прызнаемся шчыра, мы толькі ўпэўнена ідзём наперад, а ў цяперашняй сітуацыі трэба не ісці, а бегчы. Падмурак для маштабнага рыўка ёсць. І вы, спадар Прэзідэнт, вельмі правільна сказалі, што ў нас дастаткова рэсурсаў, каб дынамічна развівацца», — звярнуў увагу Аляксандр Лукашэнка. Ён прывёў канкрэтныя прыклады: за апошнія пяць гадоў у нас у пяць разоў павялічыўся тавараабарот. Паводле слоў беларускага лідара, тэмпы добрыя, але аб’ёмы жадаюць быць большымі. Разам з тым з пачатку гэтага года, нягледзячы на ўсе цяжкасці, мы прыраслі яшчэ на трэць.

Як адзначыў кіраўнік дзяржавы, у Іране карыстаюцца попытам прадукцыя нашай дрэваапрацоўкі, хімічнай прамысловасці, калійныя ўгнаенні. Беларускія пакупнікі па заслугах ацанілі не толькі цудоўныя іранскія фрукты і арэхі, але і высокатэхналагічную прадукцыю, асабліва ў сферы аховы здароўя. 

«Беларусь гатова да рэалізацыі сумесных праектаў у галіне прамысловай кааперацыі па стварэнні вытворчасцяў кар’ернай, трактарнай і сельскагаспадарчай тэхнікі. Тут мы гатовы ствараць з вамі сумесныя вытворчасці, сумесныя прадпрыемствы пры нармальных умовах і лакалізоўваць нашу тэхніку ў Іране. Разлічваем на развіццё супрацоўніцтва ў інвестыцыйнай, банкаўска-фінансавай і транспартнай сферах, навукова-тэхнічнай і іншых важных галінах, такіх як адукацыя, ахова здароўя і спорт», — заявіў Прэзідэнт.

Асобнай увагі заслугоўвае ўзаемадзеянне ў гуманітарнай сферы. Праз культурныя абмены народы знаёмяцца з традыцыямі і гісторыяй адзін аднаго, што спрыяе большаму разуменню, а ў перспектыве — паглыбленню сяброўскіх сувязяў, перакананы Аляксандр Лукашэнка. На яго думку, тут краіны дасягнулі даволі добрых вынікаў. Створаны неабходныя ўмовы для камунікацыі прадстаўнікоў культурнай галіны. На парадку дня — правядзенне Дзён культуры Беларусі ў Іране.

Аляксандр Лукашэнка адзначыў актыўную работу рэгіёнаў. Беларусь зацікаўлена ў развіцці дзеючых сувязяў і пашырэнні геаграфіі міжрэгіянальнага ўзаемадзеяння.

«Паважаныя іранскія сябры, наша супрацоўніцтва — падмурак для стратэгічнага партнёрства, уклад у стабільнасць у гэтым неспакойным свеце. Сумеснымі намаганнямі Беларусь і Іран змогуць паспяхова адказаць на сучасныя выклікі, адкрыць новыя гарызонты і пабудаваць квітнеючую будучыню для нашых краін», — заявіў Прэзідэнт Беларусі. 

Іран гатовы супрацоўнічаць з Беларуссю для нейтралізацыі незаконных заходніх санкцый

У сваю чаргу Масуд Пезешкіян падзякаваў беларускім калегам за сур’ёзныя і моцныя пазіцыі, за падтрымку Ірана падчас атак Ізраіля і ЗША. «Ваша выступленне на саміце кіраўнікоў ЕАЭС было вельмі змястоўным. Вы адзначылі горкі вопыт Чарнобыльскай АЭС і казалі пра тое, што мы павінны прадухіліць любое развіццё падзей у такім напрамку, а таксама асудзілі атакі на мірныя ядзерныя аб’екты Ірана, — звярнуўся іранскі лідар да свайго беларускага калегі. — ЗША, парушаючы ўсе міжнародныя нормы і стандарты, атакавалі мірныя ядзерныя аб’екты Ірана. Па сутнасці, яны растапталі міжнароднае права і ўсе агульнапрызнаныя нормы. Ісламская Рэспубліка Іран ніколі не развязвала вайну супраць каго-небудзь. Але, калі мы становімся мішэнню для атак, мы павінны адпаведным чынам адказваць». 

Масуд Пезешкіян упэўнены, што гэтыя атакі былі накіраваны не толькі супраць Ірана, але і супраць усіх незалежных краін свету. «Мы разумеем, што калектыўны Захад хоча дамінаваць над усім рэгіёнам. І тыя атакі былі накіраваны на ўсе незалежныя краіны свету», — заявіў ён. 

Што датычыцца непасрэдна беларуска-іранскіх адносін, то Масуд Пезешкіян адзначыў узаемную падтрымку дзвюх краін на міжнароднай арэне, што вельмі каштоўна і важна. «Мы супрацоўнічаем на аснове ўзаемнага даверу і ўзаемнай павагі. Ісламская Рэспубліка Іран гатовая супрацоўнічаць з Рэспублікай Беларусь для нейтралізацыі незаконных заходніх санкцый», — запэўніў Масуд Пезешкіян. Разам з тым ён заўважыў, што ўзровень эканамічных узаемаадносін пакуль не адпавядае ўзроўню даверу паміж Мінскам і Тэгеранам. «Мы павінны дасягнуць таго ўзроўню, пры якім зможам рэалізаваць усе дамоўленасці», — адзначыў Масуд Пезешкіян. У цэлым, паводле яго слоў, адносіны Беларусі і Ірана развіваюцца ў правільным рэчышчы.

Лідары Беларусі і Ірана падпісалі Сумесную заяву аб паглыбленым развіцці адносін

Па выніках перагавораў на вышэйшым узроўні Прэзідэнты падпісалі Сумесную заяву аб паглыбленым развіцці адносін паміж Рэспублікай Беларусь і Ісламскай Рэспублікай Іран. У заяве адлюстроўваецца падабенства пазіцый бакоў па пытаннях двухбаковых, рэгіянальных і міжнародных адносін, пацвярджаецца курс на паслядоўную інтэнсіфікацыю традыцыйна дружалюбных і стратэгічных сувязяў паміж Рэспублікай Беларусь і Ісламскай Рэспублікай Іран.

Бакі выказалі задавальненне дынамічным і паступальным развіццём беларуска-іранскага ўзаемадзеяння, актыўным абменам візітамі на вышэйшым і высокім узроўнях у апошнія гады, што надае ўстойлівы характар міждзяржаўным сувязям, што склаліся, спрыяе іх паглыбленню ва ўсіх сферах.

Беларусь і Іран пацвердзілі рашучасць развіваць двухбаковыя адносіны ў адпаведнасці з «Дарожнай картай усебаковага супрацоўніцтва паміж Рэспублікай Беларусь і Ісламскай Рэспублікай Іран на 2023-2026 гады», падпісанай падчас візіту Прэзідэнта Беларусі Аляксандра Лукашэнкі ў Іран 12-13 сакавіка 2023 года.

У заяве сцвярджаецца, што Беларусь і Іран выбудоўваюць свае адносіны на аснове прынцыпаў суверэннай роўнасці, тэрытарыяльнай цэласнасці, незалежнасці, неўмяшання ва ўнутраныя справы адзін аднаго, добрасумленнага супрацоўніцтва і ўзаемнай павагі інтарэсаў. Бакі пацвердзілі важнасць і неабходнасць захавання прынцыпу неўмяшання ва ўнутраныя справы іншых краін і непрымянення сілы або пагрозы яе прымянення, прынцыпу ўзаемавыгаднага супрацоўніцтва ў імя міру, стабільнасці і развіцця, а таксама нормаў міжнароднага права і Статута Арганізацыі Аб’яднаных Нацый.

Аб выніках перагавораў з Масудам Пезешкіянам, дасягнутых дамоўленасцях і далейшых перспектывах Аляксандр Лукашэнка расказаў прадстаўнікам СМІ

Аляксандр Лукашэнка назваў перагаворы са сваім іранскім калегам вельмі змястоўнымі, па выніках якіх дасягнулі сур’ёзных зрухаў у беларуска-іранскіх адносінах. «Добрым будзе вынікам гэтых зрухаў, калі мы ў найбліжэйшы час, як дамовіліся з Прэзідэнтам, падрыхтуем і падпішам дагавор аб стратэгічным супрацоўніцтве», — адзначыў ён.

Прэзідэнт расказаў, што сустрэча прайшла ў вельмі цёплай і канструктыўнай атмасферы. «Інакш і быць не магло. Бо нашы суверэнныя дзяржавы звязвае больш за 30 гадоў плённага супрацоўніцтва, заснаванага на шчырым сяброўстве і павазе. Для Мінска і Тэгерана не існуе закрытых тэм. У выбудоўванні дыялогу мы заўсёды зыходзім з прынцыпу ўзаемнага даверу і абавязкова ўлічваем інтарэсы адзін аднаго, — акцэнтаваў Аляксандр Лукашэнка. — Беларусь разглядае Іран у якасці важнага палітычнага і эканамічнага партнёра не толькі ў Азіяцкім рэгіёне, але і на міжнароднай арэне ў цэлым. За апошнія гады сумеснымі намаганнямі нам удалося дасягнуць сур’ёзнага прагрэсу: хуткімі тэмпамі развіваем узаемадзеянне па розных кірунках, прыярытэтных для абедзвюх краін».

Беларускі лідар расказаў, што на сустрэчы ў Палацы Незалежнасці абмеркавалі важныя аспекты двухбаковых адносін. Асаблівую ўвагу надалі развіццю гандлю і прамысловай кааперацыі, інвестыцыйнага супрацоўніцтва, а таксама рэалізацыі сумесных ініцыятыў у галіне навукі, тэхналогій і адукацыі. «Беларускі бок накіраваны на планамернае выкананне "дарожнай карты" ўсебаковага супрацоўніцтва паміж Беларуссю і Іранам да 2026 года», — заявіў Прэзідэнт. Ён расказаў, што ў найбліжэйшы час асноўныя палажэнні дарожнай карты будуць прарэвізаваны. Тое, што вельмі актуальна і трэба краінам, будзе абавязкова выканана.

«Дарожную карту» Аляксандр Лукашэнка назваў асноўным практычным дакументам і інструментам. «Дарожная карта» служыць пашырэнню партнёрства паміж краінамі па ключавых кірунках. Сёння мы падпісалі сумесную заяву, якая актуалізуе нашы планы і расстаўляе акцэнты ў дасягненні пазначаных у нашых планах мэт, — патлумачыў кіраўнік дзяржавы. — Мы яшчэ раз пацвярджаем, што, будучы адказнымі ўдзельнікамі міжнароднага супрацоўніцтва, Рэспубліка Беларусь і Ісламская Рэспубліка Іран падзяляюць агульныя каштоўнасці і прынцыпы ўзаемадзеяння суверэнных дзяржаў. Мы імкнёмся да пабудовы шматпалярнага свету, дзе кожная краіна самастойна вызначае свой шлях развіцця без знешняга ўмяшання".

Аляксандр Лукашэнка заявіў, што Беларусь лічыць эканамічным тэрарызмам незаконныя абмежавальныя меры, уведзеныя супраць Мінска і Тэгерана калектыўным Захадам. «Нашы рэспублікі паспяхова супрацьстаяць гэтай агрэсіўнай і крывадушнай санкцыйнай вайне. Гэту работу падмацоўваюць актыўныя крокі Беларусі і Ірана ў рамках ААН, ШАС, БРІКС і іншых структур, якія сёння фарміруюць новы, справядлівы, канструктыўны парадак дня міжнароднага супрацоўніцтва», — адзначыў ён. 

Прэзідэнт прывітаў глыбокае ўцягванне Ірана ў гандлёва-эканамічныя працэсы на прасторы Еўразійскага эканамічнага саюза. «Я з задавальненнем сёння пачуў з боку іранскіх калег, што ўжо ў рамках гандлёвага супрацоўніцтва паміж Іранам і ЕАЭС абнуленыя пошліны па 76 таварных пазіцыях, — падзяліўся ён. — Пачатак функцыянавання поўнафарматнага Пагаднення аб свабодным гандлі паміж ЕАЭС і Іранам пашырае геаграфію гандлёвых сувязяў, адкрывае новыя рынкі для нашых краін». Пагадненне аб свабодным гандлі паміж Іранам і ЕАЭС беларускі лідар назваў важкім укладам у фарміраванне падмурка доўгатэрміновага стратэгічнага партнёрства паміж Іранам і ЕАЭС, якое ўмацуе эканамічную бяспеку ўсіх яго ўдзельнікаў.

Аляксандр Лукашэнка завастрыў увагу на цікавым факце: усё, што вырабляюць у Беларусі, трэба Ірану. «Іран нас угаворвае, каб мы больш актыўна выкарыстоўвалі лагістычны напрамак праз Расію і Іран. Расія, Арменія, Іран і на Персідскі заліў. Угаворваюць! Дык нам гэта трэба перш за ўсё», — канстатаваў кіраўнік дзяржавы.

Прэзідэнт звярнуў увагу на тое, што перагаворы галіновых дэлегацый Беларусі і Ірана прадэманстравалі ўзаемную зацікаўленасць бакоў у прадаўжэнні рэалізацыі намечаных сумесных праектаў. Ён таксама адзначыў супрацоўніцтва Беларусі і Ірана ў гуманітарнай сферы. Паводле слоў кіраўніка дзяржавы, ёсць значны патэнцыял для развіцця культурных сувязяў, абмену ведамі і вопытам, што спрыяе паглыбленню ўзаемаразумення і сяброўства паміж нашымі народамі.

«Прынята рашэнне актывізаваць узаемадзеянне ў навукова-тэхнічным кірунку і правесці сёлета ў Мінску восьмае пасяджэнне сумеснай беларуска-іранскай камісіі па пытаннях супрацоўніцтва ў галіне вышэйшай адукацыі, навукі і тэхналогій, — працягнуў беларускі лідар. — Перакананы, падпісаныя сёння дакументы паслужаць значнаму пашырэнню партнёрства паміж нашымі дружалюбнымі краінамі». 

Прэзідэнт запэўніў, што беларускі бок зробіць усё магчымае для хутчэйшага ўвасаблення ў жыццё дасягнутых дамоўленасцяў на ўсіх узроўнях і ва ўсіх галінах.

Прэзідэнт Беларусі заявіў аб падтрымцы беларускім бокам легітымнага права Ірана на развіццё мірнага атама

У размове з прадстаўнікамі СМІ па выніках перагавораў з Прэзідэнтам Ірана Аляксандр Лукашэнка  звярнуў увагу на вострую тэму. «Не магу пакінуць без увагі вельмі напружаную сітуацыю пасля новага вітка ваеннай эскалацыі паміж Ізраілем і Іранам, што прывяло да прамога ўключэння ў канфлікт ЗША. Сілавое супрацьстаянне — сур’ёзная пагроза рэгіянальнай і міжнароднай стабільнасці і бяспекі, асабліва ў сувязі з нанясеннем удараў па інфраструктуры Ірана, у тым ліку і ядзернай, якая знаходзіцца пад кантролем МАГАТЭ. Мы падтрымліваем легітымнае права Ірана на развіццё мірнага атама. Упэўнены, для дасягнення трывалага міру важна ўстрымлівацца ад любых дзеянняў, якія могуць справакаваць новую эскалацыю. Мудрасць і дальнабачнасць павінны ўзяць верх над эмоцыямі і прадузятасцямі», — заявіў Аляксандр Лукашэнка.

Беларускі лідар яшчэ раз падзякаваў Масуду Пезешкіяну за плённы дыялог. «Памятайце, што вы і ўсе нашы іранскія сябры — заўсёды доўгачаканыя і самыя дарагія госці ў Беларусі», — рэзюмаваў ён. 

Масуд Пезешкіян: Беларусь — надзейны партнёр Ірана

Прэзідэнт Ірана ў размове з прадстаўнікамі СМІ па выніках перагавораў з Аляксандрам Лукашэнкам адзначыў, што паміж Беларуссю і Іранам ёсць поўнае разуменне, у якім кірунку развіваць адносіны паміж краінамі.

Ён назваў Беларусь надзейным партнёрам і пацвердзіў гатоўнасць рэалізоўваць усе палажэнні «дарожнай карты». «Іран сапраўды зацікаўлены ў развіцці ўсебаковых адносін з Беларуссю. У нас дасягнута шмат добрых дамоўленасцяў. Я б хацеў пацвердзіць, што Іран у супрацоўніцтве з Беларуссю не бачыць закрытых тэм», — падкрэсліў Масуд Пезешкіян. Ён адзначыў супрацоўніцтва на ўзроўні галіновых міністэрстваў і ведамстваў, але акцэнтаваў увагу на тым, што працаваць трэба больш, чым раней. Прэзідэнт Ірана перакананы, што сумеснымі намаганнямі нашы краіны змогуць павялічыць тавараабарот. Паводле яго слоў, Іран і надалей будзе супрацоўнічаць з Беларуссю на міжнароднай арэне: «Мы павінны пераадолець аднапалярны свет. Разам з беларусамі гэта магчыма».

Міністэрствы і ведамствы Беларусі і Ірана падпісалі пакет дакументаў па асобных кірунках 

Па выніках перагавораў Прэзідэнтаў дзеля канкрэтных крокаў у развіцці беларуска-іранскіх адносін міністэрствы і ведамствы абедзвюх краін падпісалі пакет дакументаў па асобных кірунках.

Сярод іх — Пагадненне па лётнай прыдатнасці паміж Нацыянальнай авіяцыйнай адміністрацыяй Рэспублікі Беларусь і Упраўленнем грамадзянскай авіяцыі Ісламскай Рэспублікі Іран.

Заключаны Мемарандум аб супрацоўніцтве ў галіне аховы навакольнага асяроддзя паміж Міністэрствам прыродных рэсурсаў і аховы навакольнага асяроддзя Рэспублікі Беларусь і Дэпартаментам навакольнага асяроддзя Ісламскай Рэспублікі Іран, Мемарандум аб узаемаразуменні паміж Міністэрствам аховы здароўя Рэспублікі Беларусь і Міністэрствам аховы здароўя і медыцынскай адукацыі Ісламскай Рэспублікі Іран па пытаннях супрацоўніцтва ў галіне аховы здароўя, абарачэння лекавых сродкаў і медыцынскага абсталявання, медыцынскай адукацыі і навукі.

Падпісаны таксама Мемарандум аб узаемаразуменні паміж Міністэрствам лясной гаспадаркі Рэспублікі Беларусь і Міністэрствам сельскагаспадарчага джыхаду Ісламскай Рэспублікі Іран аб супрацоўніцтве ў галіне лясной гаспадаркі, Мемарандум аб узаемаразуменні паміж Міністэрствам сельскай гаспадаркі і харчавання Рэспублікі Беларусь і Міністэрствам сельскагаспадарчага джыхаду Ісламскай Рэспублікі Іран у галіне здароўя жывёл і ветэрынарыі.

Дзяржаўны камітэт па стандартызацыі Рэспублікі Беларусь і Нацыянальная арганізацыя па стандартызацыі Ісламскай Рэспублікі Іран падпісалі дакумент аб узаемаразуменні ў галіне стандартызацыі, метралогіі, ацэнкі адпаведнасці і акрэдытацыі.

У ліку падпісаных дакументаў — Мемарандум аб узаемаразуменні па супрацоўніцтве ў галіне сродкаў масавай інфармацыі паміж Міністэрствам інфармацыі Рэспублікі Беларусь і Міністэрствам культуры і ісламскай арыентацыі Ісламскай Рэспублікі Іран, Мемарандум аб узаемаразуменні паміж Нацыянальнай дзяржаўнай тэлерадыёкампаніяй Рэспублікі Беларусь і арганізацыяй радыё і тэлебачання Ісламскай Рэспублікі Іран. Мемарандум аб узаемаразуменні і супрацоўніцтве заключаны паміж Беларускім тэлеграфным агенцтвам і інфармацыйным агенцтвам Ісламскай Рэспублікі Іран.

Беларускае Міністэрства культуры і іранская арганізацыя па пытаннях кінематаграфіі і аўдыёвізуальных твораў Міністэрства культуры і ісламскай арыентацыі дамовіліся аб абмене кінематаграфічнымі творамі і ўзаемным супрацоўніцтве.

Акрамя таго, заключаны мемарандумы па супрацоўніцтве ў галіне турызму, а таксама аб развіцці інвестыцый у свабодных зонах.

«Шляхоў узаемадзеяння ў нас нямала». У Іране можа хутка з’явіцца сумесная вытворчасць «Гомсельмаша»

Аб тым, як будуць рэалізоўвацца дамоўленасці і ў чым Беларусь і Іран цікавыя адзін аднаму, прама ў Палацы Незалежнасці спыталі ў профільных міністраў.

Міністр прамысловасці Андрэй Кузняцоў расказаў, што беларуская тэхніка ўжо працуе ў Іране — гэта прадукцыя нашых гігантаў МАЗ, БелАЗ. Мэта — пашырыць прысутнасць прадукцыі МТЗ. «Ужо зроблены крокі ад «Гомсельмаша», у найбліжэйшы час у Іране можа з’явіцца сумесная вытворчасць. У наступным годзе, думаю, ужо будзем паўнавартасна прысутнічаць Міністэрствам прамысловасці», — расказаў міністр. Ён зрабіў акцэнт на тым, што гаворка ідзе найперш аб кааперацыі, узаемавыгадным двухбаковым партнёрстве. «Толькі ўзаемавыгаднае двухбаковае супрацоўніцтва дасць той вынік нашым краінам, якога патрабуюць нашы кіраўнікі», — адзначыў Андрэй Кузняцоў. 

Міністр лясной гаспадаркі Аляксандр Кулік расказаў, што з 2023 года беларускі бок працуе з Іранам у галіне дрэваапрацоўкі. У 2023 годзе 12,5 тысячы метраў кубічных прадукцыі дрэваапрацоўкі было пастаўлена ў Іран. Сёлета па аб’ектыўных прычынах назіраецца невялікае прасяданне, але зацікаўленасць і патэнцыял ёсць. І візіт Прэзідэнта Ірана можа даць новы штуршок. «Іран цікавіць наша пілапрадукцыя. І нам таксама цікава вывучыць іх досвед выкарыстання драўніны, асабліва цвёрдаліставай. Шляхоў узаемадзеяння ў нас нямала. Іран цікавіць досвед беларускіх лесанарыхтовак, мы падыходзім ужо да 70 % па лесанарыхтоўках механізаваным спосабам. Развіццё нашых прамысловых прадпрыемстваў, якія выпускаюць лесанарыхтоўчую тэхніку, таксама для Ірана вельмі актуальнае пытанне», — адзначыў Аляксандр Кулік.

Валерыя СЦЯЦКО