Эканоміка ў сучасным свеце даўно стала не проста адной з галін ведаў — яна з’яўляецца асновай развіцця любой дзяржавы. Аляксандр Лукашэнка таксама неаднаразова падкрэсліваў, што менавіта эканоміка з’яўляецца пытаннем нумар адзін, якое вызначае жыццё людзей. Ад эфектыўнасці эканамічных рашэнняў залежаць устойлівасць, сацыяльны дабрабыт і перспектывы росту.

Пераканаўчая статыстыка

Беларусь рухаецца ў рытме сусветных тэндэнцый, робячы стаўку на падрыхтоўку высокакваліфікаваных спецыялістаў новага пакалення. І адной з ключавых пляцовак, дзе куецца будучая эканамічная эліта краіны, застаецца Беларускі дзяржаўны эканамічны ўніверсітэт. Сёння гэта не толькі навучальная ўстанова, але і цэнтр фарміравання кіраўніцкіх кадраў. Пра маштаб гэтай работы сведчаць лічбы, агучаныя рэктарам БДЭУ Аляксеем ЯГОРАВЫМ:

— За ўвесь час існавання нашай навучальнай установы мы падрыхтавалі 350 тысяч выпускнікоў. Аднак калі б я пералічваў іх з пункту гледжання займаных пасад, гэта было б яшчэ больш пераканаўча.

І сапраўды, за сухімі лічбамі стаяць канкрэтныя кар’еры і дзяржаўныя рашэнні. Сярод выпускнікоў універсітэта — дзясяткі прадстаўнікоў вышэйшага кіравання, адзначае рэктар:

— З гэтых 350 тысяч выпускнікоў мы падрыхтавалі 62 міністраў і кіраўнікоў ведамстваў, якія ў розныя часы займалі высокія пасады. Сёння нашы выпускнікі паспяхова працуюць на пасадах міністра эканомікі і міністра па падатках і зборах. Нават Прэм’ер-міністр — таксама наш выпускнік.

Адпавядаць сучасным выклікам

Універсітэт заслужана ганарыцца сваімі выхаванцамі. Аднак галоўнае — не толькі мінулыя дасягненні, а здольнасць адпавядаць сучасным выклікам, лічыць Аляксей Ягораў:

— Мы не знаходзімся ў адрыве ад сусветных тэндэнцый, якія сёння адбываюцца. Я заўсёды казаў і буду казаць, што мы рыхтуем кіраўніцкую эліту.

Гэта заява падкрэслівае галоўны прынцып развіцця БДЭУ — арыентацыю на актуальнасць і практычнасць адукацыі. Універсітэт актыўна ўкараняе сучасныя падыходы. Сёння БДЭУ імкнецца не толькі ўтрымліваць пазіцыі ўнутры краіны, але і пашыраць міжнародную прысутнасць. Ён становіцца пазнавальным далёка за межамі СНД, прыцягваючы студэнтаў з розных краін, у тым ліку з Кітайскай Народнай Рэспублікі.

Але ж галоўная адметнасць падрыхтоўкі запатрабаваных спецыялістаў — не аб’ём ведаў, а ўменне прымяняць іх на практыцы, падкрэслівае рэктар:

— Мы стараемся не проста даць суму ведаў, а інструментарый. Каб будучы эканаміст, бухгалтар, юрыст прыйшоў на прадпрыемства і ведаў, з якой паліцы дастаць план рахункаў, які нарматыўны дакумент прымяніць. Такі падыход фарміруе галоўную якасць сучаснага спецыяліста — самастойнасць мыслення і здольнасць дзейнічаць у нестандартных сітуацыях. Універсітэт традыцыйна робіць стаўку на практыка-арыентаванае навучанне — ні адзін кіраўнік не можа быць падрыхтаваны чыста тэарэтычна.

Менавіта гэта спалучэнне — фундаментальнай падрыхтоўкі і практычных навыкаў — дазваляе Беларускаму дзяржаўнаму эканамічнаму ўніверсітэту заставацца важным звяном у сістэме падрыхтоўкі кадраў і ўпэўнена глядзець у будучыню.

Вас чакаюць

Асобным блокам варта адзначыць ход сёлетняй прыёмнай кампаніі. Як паведаміла першы прарэктар БДЭУ Таццяна САДОЎСКАЯ, універсітэт плануе прыняць 3037 чалавек, што крыху перавышае паказчык мінулага года. З іх 1258 будуць навучацца за кошт бюджэтных сродкаў, а 1779 — на платнай аснове.

Агульныя лічбы набору застаюцца стабільнымі і амаль не адрозніваюцца ад леташніх. Разам з тым назіраецца пэўнае змяшчэнне інтарэсу ў бок завочнай формы навучання, што адпавядае сучасным тэндэнцыям у адукацыйнай сферы, гаворыць Таццяна Садоўская. Значная ўвага сёння ўдзяляецца развіццю сярэдняй спецыяльнай адукацыі: многія выпускнікі пасля дзевяці класаў працягваюць навучанне ў каледжах, але ў далейшым маюць магчымасць паступаць ва ўніверсітэт.

Дарэчы, мэтавы набор у БДЭУ сёлета прадугледжаны па дзевяці спецыяльнасцях: «эканоміка», «эканоміка і кіраванне», «сацыялогія», «паліталогія», «бухгалтарскі ўлік, аналіз і аўдыт», «фінансы і крэдыт», «таваразнаўства», «правазнаўства» і «статыстыка». Час выбіраць, і яго застаецца ўсё менш.

Міхаіл ДАНІЛКОВІЧ