У Беларусі 19 студзеня адзначаецца праваслаўнае свята Вадохрышча. Многія, трымаючыся традыцыі, рыхтуюцца акунуцца ў палонку.

Для забеспячэння бяспекі ратавальнікі будуць несці дзяжурства ў месцах, абсталяваных для купання. У Бялыніцкім раёне можна будзе акунуцца ў сядзібе «Глухарыны ток» у вёсцы Асліва, у Бабруйску — па вул. Зара, 74В, у раёне пляжа № 2, а таксама па вул. Садовай, у раёне лодачнага кааператыва «Няптун», у Бабруйскім раёне абсталяванае месца будзе ў вёсцы Туркі. 

Акунуцца ў палонку ў Глуску можна ў месцы адпачынку «Лодачная станцыя», у Горках — на Аршанскім возеры па вул. Якубоўскага, у Дрыбінскім раёне — у аграгарадку Расна на Грымячай крыніцы, у Кіраўскім раёне — у вёсцы Пацава Слабада ў зоне адпачынку «Крынічка», у Клічаве — па вул. Крываноса ў раёне гарадской лазні, у Касцюковічах — па вул. Зіньковіча на возеры ў зоне адпачынку «Баравец», у Клімавіцкім раёне — у вёсцы Барысавічы.

У Крычаве акунуцца можна будзе на гарадскім пляжы ракі Сож па вул. Сіроцініна і ў купелі Пакроўскай царквы па вул. Касманаўтаў, 12. У Крычаўскім раёне — у купелі ў вёсцы Нізкі. 

У Мсціслаўскім раёне — на крыніцы Пустынскага Свята-Успенскага манастыра, а ў Мсціславе — на крыніцы «Кагальны калодзеж» па вул. Леніна. У Асіповіцкім раёне акунуцца можна на гарадскім пляжы Асіповіцкага вадасховішча і ў купелі вёскі Смык. У Слаўгарадскім раёне на Блакітнай крыніцы, у Хоцімскім раёне — на возеры ў вёсцы Багданаўка, у Чавускім — каля вёскі Нова-Ягораўка ва ўрочышчы «Байкова», у Круглянскім раёне — на крыніцы паблізу Цяцерынскай ГЭС. У Чэрыкаве месца для акунання арганізуюць на возеры па вул. Ракасоўскага

У Быхаўскім раёне ўсе жадаючыя змогуць акунуцца ў купелі на тэрыторыі Свята-Узнясенскага жаночага манастыра ў аграгарадку Баркалабава. У Шклоўскім раёне — на Трафімавай крыніцы, а ў Шклове — у купелі на рацэ Серабранка і на крыніцы па вул. М. Зарэчная

У Магілёве месцы для акунання будуць арганізаваны на Пячэрскім і Святым азёрах, а ў Магілёўскім раёне — купель у аграгарадку Палыкавічы. 

Акунацца ў палонку трэба вельмі асцярожна, паколькі кантраст тэмператур цела і халоднай вады можа стаць прычынай спазмаў. Каб не падвяргаць сваё жыццё небяспецы, ні ў якім разе не варта купацца ў стане алкагольнага ап’янення, ныраць і плаваць пад вадой, падаваць крыкі лжывай трывогі, збірацца групамі на лёдзе ля краю палонкі, заходзіць за агароджы. Купанне дзяцей дапускаецца толькі з бацькамі або дарослымі сваякамі. Дзеці павінны быць на адлегласці выцягнутай рукі, пад пастаянным наглядам дарослых. Знаходзіцца ў вадзе доўгі час не варта — усяго некалькі секунд. Пасля трэба хутка расцерціся ручніком і надзець сухую цёплую вопратку. 

Спецыялісты не раяць акунацца ў палонку людзям, якія маюць цяжкія хранічныя захворванні, для якіх рэзкая тэмпературная нагрузка можа быць вельмі небяспечная.