У Савеце Рэспублікі прайшла сустрэча з прадстаўнікамі Міністэрства сельскай гаспадаркі Танзаніі. Старшыня Савета Рэспублікі Наталля Качанава падкрэсліла, што Танзанія — дружалюбная для Беларусі дзяржава і краіны могуць развіваць супрацоўніцтва абсалютна па ўсіх напрамках. «Тавараабарот паміж нашымі краінамі за 2025 год перавысіў $17 млн.Нам неабходна далей прасоўвацца ў нашым супрацоўніцтве», — падкрэсліла яна.

Старшыня Савета Рэспублікі адзначыла, што Беларусь гатова пастаўляць у Танзанію сельскагаспадарчую тэхніку. Таксама краіны могуць пасупрацоўнічаць у гуманітарнай сферы, бо ў Беларусі створана выдатная сетка ўстаноў адукацыі розных узроўняў.

«У першую чаргу нас цікавіць механізацыя сельскай гаспадаркі. Для гэтага патрэбныя трактары, абсталяванне для ірыгацыі, для зборкі ўраджаю і гэтак далей. І мы сапраўды зацікаўленыя ў тым, што можа прапанаваць нам Беларусь. У нас была вельмі добрая дыскусія з беларускім бокам, і мы маем намер працаваць разам на агульнае дабро нашых народаў», — расказаў журналістам па выніках сустрэчы пастаянны сакратар Міністэрства сельскай гаспадаркі Танзаніі Джэральд Джэфры Мвелі. 

У складзе дэлегацыі з Танзаніі была член парламента краіны Джэска Юда Мбога, былі абмеркаваныя пытанні актывізавання міжпарламенцкага супрацоўніцтва. 

У сустрэчы таксама прынялі ўдзел намеснік прэм’ер-міністра Віктар Каранкевіч і члены Прэзідыума Савета Рэспублікі.