Два маштабныя мерапрыемствы пад агульнай назвай «Благадатны конь прыносіць шчасце. Канцэрт «Вясёлае Свята Вясны» адбудуцца 13 лютага ў Рэспубліканскім Палацы культуры прафсаюзаў, а таксама 14 лютага ў Першым нацыянальным гандлёвым доме.

У пасольстве адзначылі: «Свята Вясны, як важнейшае традыцыйнае свята кітайскай нацыі, уключана ў Рэпрэзентатыўны спіс нематэрыяльнай культурнай спадчыны чалавецтва ЮНЕСКА. Мерапрыемствы, прысвечаныя гэтаму кітайскаму навагодняму святу, праводзяцца ў Беларусі ўжо больш за дзесяць гадоў. У гэтым годзе з Кітая прыедуць некалькі вядомых мастацкіх калектываў, якія выступяць на адной сцэне з вядомым беларускім дзяржаўным акадэмічным заслужаным харэаграфічным ансамблем „Харошкі“. Такім чынам, гэта мерапрыемства стане сумесным навагоднім культурным святам, якое аб’ядноўвае ўсходнія і заходнія традыцыі».

Кітайская частка праграмы ўключае выступленні высокапрафесійных мастацкіх калектываў. Для беларусаў будуць выступаць артысты з танцавальнага ансамбля «Хэюнь» Пекінскай акадэміі танца з традыцыйнымі кітайскімі танцамі, аркестр «Цынлань», сфарміраваны з лепшых музыкантаў Кітая, цыркавая арт-група «Шаахуа», якая складаецца з выдатных артыстаў Кітайскага цырка, калектыў баявых мастацтваў «Лун’юнь» каманды Чэн Цзябань школы самога Джэкі Чана, а таксама многія заслужаныя артысты Кітая. Праграма ахоплівае танцы, інструментальную музыку, акрабатыку і баявыя мастацтвы, у поўнай меры дэманструючы багатую традыцыйную культуру Кітая і яе сучасную дынаміку.

Акрамя таго, перад пачаткам канцэртаў будуць арганізаваны інтэрактыўныя зоны з дэманстрацыяй нацыянальнай культурнай спадчыны, арганізаваныя дэлегацыяй з Пекіна, такія як маляванне карамеллю, размалёўванне масак пекінскай оперы і клуазане (мастацкія вырабы з эмаллю). Будзе таксама прадстаўлена выстаўка макетаў дызайнаў, прысвечаных Году каня і арганізаваны культурныя інтэрактыўныя майстар-класы пры ўдзеле Інстытутаў Канфуцыя БНТУ і БДУФК.

Арганізатарамі мерапрыемства з’яўляюцца Міністэрства культуры Беларусі, Міністэрства культуры і турызму КНР, Мінскі гарадскі выканаўчы камітэт і пасольства КНР у Беларусі. Выканаўцы — Упраўленне культуры і турызму Пекіна, Кітайскі культурны цэнтр у Мінску.

І яшчэ адно мерапрыемства адбудзецца 15 лютага. Яго арганізуюць сумесна Асацыяцыя арганізацый кітайскіх суайчыннікаў «Хуацяа», пасольства Кітайскай Народнай Рэспублікі ў Рэспубліцы Беларусь, Беларускі дзяржаўны акадэмічны музычны тэатр.

На сцэне гэтага тэатра адбудзецца грандыёзны святочны канцэрт, прысвечаны самаму важнаму святу кітайскага календара. Святочны сімфанічны канцэрт будзе называцца «Кітайскі Новы год 2026».

Кітайскі Новы год — гэта свята, у якім пераплятаюцца тысячагадовыя традыцыі, глыбокі сімвалізм і радасная надзея на будучыню. Канцэрт прызначаны перадаць гэту шматгранную атмасферу, прадставіўшы сінтэз музычнай спадчыны Усходу і Захаду.

Цэнтральнай падзеяй вечара стане выступленне сімфанічнага аркестра пад кіраўніцтвам дырыжора Марыны Траццяковай. Гэты вечар стане яркім сімвалам дружбы і дыялогу паміж Беларуссю і Кітаем, упэўнены ў пасольстве Кітайскай Народнай Рэспублікі ў Рэспубліцы Беларусь.