— 19 гадоў, калі быць дакладным. Самае важнае, у мяне атрымалася пераадолець у сабе жах, які ў мяне быў, калі я прыйшоў у «МІР» з Усерасійскай дзяржаўнай тэлевізійнай і радыёвяшчальнай кампаніі. Быў страх, што я не змагу выцягнуць гэту каманду ў вышэйшую лігу. 

— Тады будзе лагічнае пытанне з катэгорыі было-стала. Як змяніўся «МІР» пад вашым кіраўніцтвам? 

— Мы робім лепшае тэлебачанне ў СНД з пункту гледжання тэхналогій. Напрыклад, тэлеканал «МІР» першым у Садружнасці выйшаў у прамы эфір з віртуальнай студыі. А воблачны вытворчы комплекс дазваляе працаваць журналістам літаральна з любога месца ў свеце. Сёння мы, я лічу, знаходзімся ў першай дзясятцы лепшых тэлевізійных каманд на самым канкурэнтным рынку ў Расіі. 

— І як пры гэтым атрымліваецца захоўваць баланс інтарэсаў усіх дзяржаў-заснавальніц?

— Старажытныя грэкі казалі, што смак — гэта пачуццё меры. Вось і ўсё. 

— А ў чым сакрэт «МІРу»? Чаму яго глядзяць і слухаюць ва ўсіх краінах Садружнасці?

— Па-першае, таму што гэта цікава. Па-другое, таму што гэта веды, якія нясуць пэўную выгаду. Па-трэцяе, таму, што мы робім добрае тэлебачанне.

— Пакаленне «зумераў» не глядзіць класічнае тэлебачанне. Пры гэтым няспынна скроліць відэа ў вертыкальным фармаце. Што «МІР» прапануе для моладзі? 

— Мы прапануем розныя фарматы кароткіх відэа, так званыя шортсы. Галоўнае ў тым, што любы якасны кантэнт у інтэрнэце створаны намі — братамі-тэлевізіёншчыкамі, то бок прафесіяналамі, а не нейкімі, пардон, блогерамі. Усё ж такі глядзяць толькі тое, што зроблена якасна. А «МІР», я лічу, — гэта сінонім якасці. 

— Брэнд «Разам кожны дзень» аб’ядноўвае ўсе СМІ МТРК «МІР». На каналах «МІР» і «МІР 24» выходзіць інфармацыйная праграма пад гэтай назвай, на радыё «МІР» — чатырохгадзіннае музычна-інфармацыйнае шоу. У чым аб’яднаўчая ідэя?

— Усё проста. «МІР» — гэта вялікая шматнацыянальная каманда, якая працуе ў краінах Садружнасці і ў Грузіі. І мы расказваем і паказваем толькі тое, што цікава нам самім, а значыць, цікава ўсім, а не толькі тэлегледачам, радыёслухачам або карыстальнікам сацсетак нейкай адной краіны.

— Штучны інтэлект — даніна модзе ці неабходнасць? Ці не падман гэта? 

— Не, проста інструмент. Напрыклад, балты на коле можна зацягваць уручную, а можна пнеўматычным ключом. Усё роўна ўсё залежыць ад прафесіяналізму чалавека. І калі ў аўтара кантэнту, створанага з дапамогай ШІ, не хапае адукацыі або адсутнічае талент, гэта будзе відаць. 

— Вы заўсёды адразу бачыце, які кантэнт створаны з дапамогай ШІ?

— За кіламетр. Але інструменты ШІ ўдасканальваюцца. І цяпер, напрыклад, ужо немагчыма ўявіць стварэнне міжпраграмнага афармлення канала без тэхналогій штучнага інтэлекту. 

— У кожнага народа ёсць традыцыі, ёсць яны і ў кожнай сям’і. А ці ёсць традыцыі ў тэлерадыёкампаніі «МІР»?

— Добрых традыцый шмат. Па-першае, дапамагаць дабрачынным фондам. Па-другое, аддаваць эфір дзецям першага чэрвеня і праводзіць напярэдадні першага верасня «Дзень ведаў аб тэлебачанні і радыё», запрашаць да сябе гасцей. Прычым мы гэта робім не толькі ў Маскве, але і ў Мінску, Бішкеку, Баку і іншых краінах, у якіх у нас ёсць нашы філіялы і прадстаўніцтвы. Ну, і плюс, мы разам з валанцёрамі з розных краін удзельнічаем у суботніках. Прыбіраем узбярэжжа Каспія ў Азербайджане, берагі Ісык-Куля ў Кыргызстане, саджаем дрэвы па ўсей Садружнасці. Іх ужо дзясяткі тысяч. А ў нацыянальны дзень донара ў Маскве і Дзень Ашура ў Баку ўдзельнічаем у акцыях па здачы крыві. Сярод нашых супрацоўнікаў нямала ганаровых донараў. 

Бліц-апытанне:

— На сняданак каша або яечня?

— Яечня. Таму што бялок.

— Кніга або серыял?

— Адназначна кніга.

— Якую чытаеце зараз? 

— «Страчаныя дзяўчаты Рыма» Даната Карызі.

— Сілавыя трэніроўкі або кардыя?

— Кардыя.

— І колькі разоў на тыдзень трэніруецеся?

— Штодня, сем дзён на тыдзень.

— Мора ці горы? 

— Мора, бо супакойвае.

— Маладосць або вопыт?

— Вядома, вопыт.

— Якую сваю звычку лічыце самай карыснай? 

— Прачынацца і ўставаць тады, калі гэта трэба. У любы час.

Ад слоў старшыні медыяхолдынга — да спраў на месцах. Аб дабрачынных ініцыятывах Нацыянальнага філіяла Міждзяржаўнай тэлерадыёкампаніі «МІР» у Рэспубліцы Беларусь расказвае яго дырэктар Вольга Шпілеўская: 

— Як Нацыянальны філіял «МІРа» ў Беларусі, мы заўсёды лічылі дабрачыннасць неад’емнай часткай сваёй місіі — мы актыўна далучаемся да розных добрых ініцыятыў і самі іх ініцыіруем. Мы ўдзельнічаем у «Васільковым патрулі», каб разам з валанцёрамі прынесці цяпло тым, хто асабліва мае патрэбу ў дапамозе зімой. Мы высадзілі яблыневы сад пад Трасцянцом і ўзялі на сябе абавязацельствы: ураджай пойдзе дзецям і састарэлым. Мы кожны год праводзім акцыю «Збяром партфель разам» і самі ездзім у Івянецкую школу-інтэрнат — прывозім абсталяванне, ладзім для дзяцей свята. Для нас гэта не разавая кампанія і не радок у справаздачы. «МІР» — гэта каманда, якая робіць тэлебачанне, але перш за ўсё — каманда людзей, і мы лічым сваім абавязкам быць побач там, дзе патрэбна рэальная дапамога. Мы здымаем і паказваем тое, што важна, — але дакладна гэтак жа мы робім і тое, што важна, за межамі эфіру.

Наша даведка

Міждзяржаўная тэлерадыёкампанія «Мір» — гэта садружнасць медыярэсурсаў, у якую ўваходзяць тэлеканалы «Мір», «Мір 24», Радыё «Мір», а інфармацыйны партал MIR24.TV і акаўнты ў найбуйнейшых сацыяльных сетках. Агульны ахоп аўдыторыі медыяхолдынга больш за 180 млн чалавек.