Сёлета 70 журналістаў і блогераў на адзін дзень прымералі на сябе ролю ратавальнікаў ва ўмовах, максімальна набліжаных да рэальных. Удзельнікі паспрабавалі тушыць пажары, працаваць на вышыні і нават ратаваць з агню пацярпелых. Такі вопыт кардынальна мяняе ўспрыманне работы ратавальнікаў і дапамагае інакш зірнуць на каштоўнасць чалавечага жыцця. 

Дарэчы, сучасны свет бяспекі немагчымы без выбудаванага дыялогу паміж ратавальнікамі і журналістамі і блогерамі, зазначыў памочнік міністра — прэс-сакратар МНС Яўген Бараноўскі.

— Гэты мост даверу, мост разумення і, мусіць, у нейкай ступені мост сэнсаў — ён важны ў нашай рабоце. Наша мерапрыемства якраз і выбудоўвае гэты давер. «Адзін дзень з МНС» — гэта не проста іміджавае мерапрыемства, гэта мост паміж намі. Паглыбляючы журналістаў у прафесію ратавальніка, мы ўстанаўліваем трывалы кантакт. Адна справа — назіраць за працай ратавальнікаў з боку, іншая — разумець, што менавіта яны робяць, разумець спецыфіку, — адзначыў Яўген Бараноўскі. — Інфармацыя хуткаплынная, таму важна кожнае слова, кожная каштоўнасць, якая сёння транслюецца лідарамі меркаванняў і ў сродках масавай інфармацыі. Ад гэтага ў тым ліку залежыць і пытанне бяспекі беларускага грамадства, нашай дзяржавы.

Без інфармацыйнага суправаджэння немагчыма і ўстойлівае фарміраванне культуры бяспекі, гатоўнасці да надзвычайных сітуацый. Нездарма ў такіх трагедыях, як пажары, здарэнні на вадзе, у экасістэмах, у аснове заўсёды ляжыць чалавечы фактар. Фарміраванне ўнутранай адказнасці, адказнасці за сябе і сваіх блізкіх — адна з ключавых задач, якую МНС вырашае, у тым ліку ўзаемадзейнічаючы з прадстаўнікамі медыя. 

Да таго ж, паглыбленне журналістаў у прафесію ратавальніка — гэта магчымасць наглядна паказаць уклад дзяржавы ў забеспячэнне бяспекі людзей. «Калі мы фізічна абараняем людзей, журналісты выбудоўваюць шчыт праз слова, праз кантэнт. Гэты тандэм прыносіць свой плён», — падкрэсліў Яўген Бараноўскі. 

Аміна НАЗАРАВА 
Фота аўтара