Калі пакупнік мае права патрабаваць маральную кампенсацыю, калі персанал ходзіць па пятах і перашкаджае спакойна выбіраць тавары? Пра гэта расказвае «Мінская Праўда».
У сітуацыі разбіраемся з адвакатам Мінскай гарадской калегіі Дар’яй Хаткевіч.
Калі персанал парушае правы пакупніка
Адвакат адразу адзначыла, што прамой забароны «хадзіць за пакупніком» у законе не ўстаноўлена. Аднак, згодна з Законам «Аб абароне правоў спажыўцоў», прадавец абавязаны стварыць умовы для свабоднага выбару тавару (арт. 5).
— Са зместу пастановы Савета Міністраў № 703 ад 22.07.2014, прадавец абавязаны забяспечыць культуру абслугоўвання і стварыць неабходныя ўмовы для азнаямлення спажыўца з таварамі і іх выбару. Дакучлівае суправаджэнне, якое стварае дыскамфорт, фактычна перашкаджае свабоднаму выбару, што з’яўляецца парушэннем устаноўленага парадку гандлю. Калі сачэнне перашкаджае агляду тавару або стварае атмасферу недаверу, гэта можа быць расцэнена, як парушэнне культуры абслугоўвання, — сказала Дар’я Хаткевіч.
Што рабіць, калі просьбы не дапамагаюць?
Юрыст патлумачыла, як дзейнічаць, калі супрацоўнік ігнаруе просьбу пакупніка.
— Запатрабуйце тлумачэння прычын такой пільнай увагі. Калі ў магазіне няма канкрэтных падазрэнняў у здзяйсненні вамі правапарушэння, дзеянні персанала выглядаюць неабгрунтаванымі. Вы маеце права пакінуць запіс у кнізе заўваг і прапаноў (яна абавязкова павінна быць). Апішыце сітуацыю, і на гэты зварот адміністрацыя абавязана даць пісьмовы адказ на працягу 15 дзён, — растлумачыла эксперт.
Ці можна прыцягнуць магазін да адказнасці?
Прыцягнуць магазін да адміністрацыйнай адказнасці менавіта за «хаду побач» складана, бо гэта цяжка даказальна, павінны быць важкія падставы і пэўныя акалічнасці — у кожным выпадку індывідуальныя. Калі паводзіны прадаўца нанеслі вам маральную шкоду (напрыклад, справакавалі прыступ гіпертаніі ці іншае), вы маеце права патрабаваць кампенсацыі маральнай шкоды ў судовым парадку, — адзначыла адвакат.
Важна адзначыць, што падобныя кампенсацыі будуць абгрунтаванымі пры наяўнасці дакументаў, якія пацвярджаюць названыя абставіны, а не проста «слоўныя» аргументы.
— Пры гэтым, надгляд рэчаў і дакументаў у гандлёвых арганізацыях дапускаецца, калі ў магазіна ёсць адпаведная ліцэнзія і сістэма аховы. Патрабаванне будзе правамерным, калі такія дзеянні прапісаны ў лакальных дакументах магазіна. Іх вы маеце права папрасіць паказаць, — падсумавала юрыст.
