Пры нараджэнні першага дзіцяці сям’і выплацяць аднаразовую дапамогу ў памеры 5303,70 рубля. Калі будучая мама да 12-тыднёвага тэрміну цяжарнасці стане на ўлік у арганізацыю аховы здароўя, то ёй дадаткова выплацяць аднаразовую дапамогу ў памеры 530,37 рубля. Такім чынам, сямейны бюджэт папоўніцца на агульную суму ў 5834,07 рубля. 

«Калі будучая мама працуе, то ёй належыць дапамога па цяжарнасці і родах. Сярэдні памер такой выплаты — больш за 7,6 тыс. рублёў. Аднак ён разлічваецца індывідуальна», — падкрэслілі ў ведамстве.

Пры нараджэнні другога дзіцяці і наступных дзяцей аднаразовая дапамога складзе 7425,18 рубля. Жанчынам, якія сталі на ўлік па цяжарнасці ў жаночай кансультацыі да 12-тыднёвага тэрміну, заплацяць таксама яшчэ 530,37 рубля. Агульная выплата без уліку дапамогі па цяжарнасці і родах для працуючых мам у такім выпадку будзе роўная 7955,55 рубля. 

Пры нараджэнні трэцяга і наступных дзяцей да агульнай сумы выплат у 7955,55 рубля прызначаецца сямейны капітал у памеры 35 505 рублёў.