Як паведамілпа Група па інфармацыі і сувязі з грамадскасцю УСК па горадзе Мінску, шматступенная схема падману пачалася ў канцы студзеня гэтага года, калі 66-гадовай жыхарцы сталіцы патэлефанавала невядомая жанчына з прапановай замяніць дамафон. Мінчанка спачатку адмовілася ад такой прапановы, але зламысніца праявіла настойлівасць, сцвярджаючы, што старыя ключы неўзабаве перастануць працаваць, а новае абсталяванне дазволіць карыстацца бескантактавым доступам праз СМС-код. Паверыўшы пераканаўчым довадам, жанчына прадыктавала лічбы з паведамлення, а затым і свае персанальныя даныя ўяўнаму «майстру», які нібы павінен быў прыйсці на наступны дзень.

Аднак замест візіту спецыяліста пенсіянерцы паступіў нечаканы званок. На гэты раз аферысты заявілі, што ў адносінах да пенсіянеркі праводзіцца праверка з-за быццам бы пераводу грашовых сродкаў у адрас Узброеных сіл Украіны. Для ўзмацнення псіхалагічнага ціску ашуканцы выкарыстоўвалі відэасувязь, падчас якой ілжэсупрацоўнік праваахоўных органаў дэманстраваў лісток з напісаным ідэнтыфікацыйным нумарам пацярпелай і дакументы, якія нібыта пацвярджаюць перавод грошай. Ён заявіў, што для дапамогі следству неабходна на працягу сутак перадаць праз кур’ера ў банк на праверку ўсе наяўныя дома грошы.

Спалоханая ахвяра сказала, што ўсе сродкі захоўваюцца ў сейфе, ключ ад якога ў яе мужа. Тады аферысты, прадставіўшыся сынам пацярпелай, выклікалі майстра па адкрыцці замкоў, і праінструктавалі яе: нікому не паведамляць аб «спецаперацыі» і растлумачыць майстру, што ў сейфе ляжаць неабходныя тэрмінова дакументы.

Праз некалькі гадзін да дома прыбыў кур’ер, якому ашуканая жанчына перадала 260 тысяч рублёў. На гэтым злачынцы не спыніліся: на наступны дзень яны зноў звязаліся з пацярпелай і пад пагрозай «неспрыяльных наступстваў» запатрабавалі пацвердзіць спісанне сродкаў з яе банкаўскіх рахункаў. Знаходзячыся некалькі дзён у стрэсе, яна выканала ўсе патрабаванні.

Паралельна ашуканцы спрабавалі ўздзейнічаць і на мужа жанчыны. Западозрыўшы нядобрае, мужчына спыніў размову. Калі зламыснікі зноў патэлефанавалі яму, сцвярджаючы, што яго жонка «трапіла ў бяду», ён неадкладна адправіўся дадому і выклікаў міліцыю. Толькі тады пацярпелая ўсвядоміла, што стала ахвярай старанна спланаванай афёры.

Агульная сума ўрону склала больш за 280 тысяч рублёў.

Маскоўскім (г. Мінска) раённым аддзелам Следчага камітэта распачата крымінальная справа па ч. 4 арт. 209 (махлярства, учыненае ў асабліва буйным памеры) Крымінальнага кодэкса Рэспублікі Беларусь. Зараз праводзяцца следчыя дзеянні і аператыўна-вышуковыя мерапрыемствы, накіраваныя на ўстанаўленне асоб, якія ўчынілі злачынства.