«Сёння работа ўсяго Беларускага таварыства паляўнічых і рыбаловаў не дае чаканага выніку. Прычына гэтага зразумелая, і знаходзіцца яна на ніжнім звяне нашай арганізацыі — у пярвічных арганізацыях і паляўнічых гаспадарках. Па факце сёння БТПРам кіруе не старшыня цэнтральнага праўлення, не абласныя праўленні і нават не старшыні раённых аргструктур. Сёння таварыствам кіруе „сярэднестатыстычны егер“. Ён вырашае, калі будзе паляванне, што будзе да адстрэлу, хто паедзе, колькі заплаціць, куды пойдуць грошы, хто будзе на якім нумары, ці будзе ўвогуле выконвацца закон. Гэта не эмоцыі, гэта канстатацыя факту», — сказаў старшыня РДГА «БТПР» Ігар Шуневіч.

Ён перасцярог прысутных ад «рэзкіх дзеянняў», растлумачыўшы, што гэты паляўнічы год дапрацоўваецца па старых правілах. Людзі павінны спакойна закрыць пуцёўкі, даць справаздачу, здаць зброю на захоўванне. А вось з 1 студзеня ўсё кардынальна зменіцца. Асноўная змена, якая дакранаецца кожнага, — егер перастае быць арганізатарам палявання. Падлоўчы становіцца выключна выканаўцам — вытворцам палявання. Гэта значыць, што ў егера больш не будзе асабістай кліенцкай базы, ён не будзе мець права самастойна запрашаць паляўнічых, дамаўляцца аб сустрэчах, прымаць грошы.

Падлоўчы не будзе вырашаць, дзе і калі будзе праводзіцца паляванне. Ён будзе атрымліваць ад свайго непасрэднага кіраўніка (старшага егера, паляўніцтвазнаўцы або старшыні раённай структуры) дакладнае вытворчае заданне, аформленыя дакументы, пуцёўкі і паліва па талонах або картках — і выконваць яго. Усе зносіны з паляўнічымі па арганізацыі калектыўных паляванняў, збор грошай, выдача пуцёвак — поўнасцю кладуцца на раённыя і міжраённыя структуры, на паляўніцтвазнаўцаў і старшынь.

Паводле слоў Ігара Шуневіча, цяпер гэта неабходна зрабіць таму, што сённяшняя сістэма спараджае безадказнасць на ўсіх узроўнях, вядзе да матэрыяльных страт, прыводзіць да шматлікіх скаргаў паляўнічых, іміджавых выдаткаў і страт. З новага паляўнічага сезона такой схемы больш не будзе. «Кіраўнік арганізоўвае і адказвае за ўсё, што адбываецца ў яго гаспадарцы, — 24 гадзіны за суткі, сем дзён у тыдзень, 365 дзён у годзе. У выхадны, у свята, ноччу — не важна», — падкрэсліў ён. Старшыня зазначыў, што большасць з дэлегатаў з’езда кіруюць людзьмі, але робяць гэта інтуітыўна, «як прывыклі». А гэтага недастаткова, трэба ведаць хаця б асновы тэорыі кіравання.

Пры гэтым ён паабяцаў «сур’ёзнае матэрыяльнае стымуляванне» тым егерам, якія сумленна пяройдуць на новую сістэму, будуць якасна выконваць толькі сваю прамую работу і прыносіць даход арганізацыі. Будзе распрацавана празрыстая сістэма прэмій і надбавак. «І яшчэ раз нагадаю: мы — грамадская арганізацыя. Наша галоўная статутная мэта — максімальна поўнае задавальненне патрэб членаў грамадства ў паляванні, рыбалцы і адпачынку на прыродзе. А не ператварэнне ў камерцыйную структуру, дзе галоўнае — асабісты заробак», — адзначыў Ігар Шуневіч.

Прэзідэнтам Рэспублікі Беларусь 13 лютага 2023 года прыняты ўказ № 35, які даў старт і нарматыўна замацаваў асновы рэарганізацыі РДГА «БТПР».