Любаншчыну можна без перабольшвання назваць раёнам з развітой інфраструктурай. Мясцовыя арганізацыі і прадпрыемствы працуюць з прыбыткам, ажыццяўляюцца інвестыцыйныя праекты, актыўна развіваюцца сельскагаспадарчая, будаўнічая, сацыяльная, лесагаспадарчая і многія іншыя галіны. Дзякуючы высокім паказчыкам у многіх сферах Любаншчына ўваходзіць у лік найлепшых раёнаў Мінскай вобласці. Пра перспектывы раёна — наша размова са старшынёй Любанскага райвыканкама Віталём ПЛАТУНОМ.
— Віталь Віктаравіч, раскажыце, калі ласка, пра асноўныя кірункі развіцця Любанскага раёна.
— Сёлета Любаншчына дэманструе выкананне асноўных даведзеных паказчыкаў сацыяльна-эканамічнага развіцця. Па выніках першага паўгоддзя забяспечана выкананне паказчыкаў па намінальнай налічанай сярэднямесячнай зарплаце, сукупных паступленнях даходаў у бюджэт раёна, інвестыцыях у асноўны капітал, будаўніча-мантажных работах і рознічным тавараабароце.
— Якія інвестыцыйныя праекты запланавана ажыццявіць у раёне?
— Адзначу, што інвестыцыйная дзейнасць — гэта ключавы кірунак перспектыўнага развіцця Любанскага раёна. У пералік інвестыцыйных праектаў па праграме «Адзін раён — адзін праект» на 2025 год уключаны два праекты са стварэннем новых рабочых месцаў, адзін з якіх ужо рэалізаваны. У сельскагаспадарчай галіне рэалізаваны тры праекты. Ключавым з’яўляецца праект па будаўніцтве горна-ўзбагачальнага комплексу. Ён значны не толькі для Любанскага раёна, але і для Мінскай вобласці і краіны ў цэлым. Да 2030 года запланаваны будаўніцтва і рэканструкцыя шэрагу сацыяльна значных аб’ектаў Любаншчыны.
— Будучыня — у руках моладзі. Як на Любаншчыне падтрымліваюць маладыя і шматдзетныя сем’і?
— На тэрыторыі раёна ажыццяўляецца шэраг дзяржаўных праграм, накіраваных на падтрымку маладых і шматдзетных сем’яў. Сярод іх — Дзяржаўная праграма «Сацыяльная абарона» на 2021–2025 гады, у рамках якой прадугледжаны мерапрыемствы, накіраваныя на аказанне сем’ям або грамадзянам, што маюць патрэбу, дзяржаўнай адраснай сацыяльнай дапамогі ў выглядзе аднаразовай штомесячнай выплаты, харчавання для дзяцей першых двух гадоў жыцця, паслугі сацыяльнага абслугоўвання сем’яў з дзецьмі, а таксама паслугі нянькі.
У рамках Дзяржаўнай праграмы «Рынак працы і садзейнічанне занятасці» на 2021–2025 гады маладым і шматдзетным сем’ям аказваецца дапамога ў працаўладкаванні. Рашэннем райвыканкама штогод устанаўліваецца бронь для працаўладкавання бацькоў са шматдзетных і няпоўных сем’яў.
Ахвотным пачаць свой бізнес прапаноўваецца субсідыя на адкрыццё ўласнай справы, якую ў перыяд з 2021 да 2025 года атрымалі сем шматдзетных бацькоў і 14 маладых людзей.
З мэтай замацавання маладых работнікаў на працоўных месцах меры сацыяльнай падтрымкі прадугледжваюцца ў калектыўных дагаворах.
Дзяржаўная праграма «Здароўе народа і дэмаграфічная бяспека» на 2021–2025 гады ўключае маштабны комплекс мер падтрымкі сем’яў. Так, шматдзетным выплачваецца дапамога ў сувязі з нараджэннем і выхаваннем дзяцей, прызначаецца сямейны капітал, а праца маці заахвочваецца дзяржаўнай узнагародай — ордэнам Маці.
— Віталь Віктаравіч, якім чынам забяспечваюцца жыллём грамадзяне, што маюць у ім патрэбу?
— Штогод у раёне ў сярэднім уводзіцца ў эксплуатацыю каля 6 тысяч квадратных метраў жылля, у тым ліку арэнднага, для жыхароў раёна, якія маюць у ім патрэбу, а таксама маладых спецыялістаў.
— Вядома, што прыгожыя, дагледжаныя вуліцы і дамы — візітка раёна. Раскажыце аб рабоце па добраўпарадкаванні Любаншчыны.
— Мерапрыемствам, накіраваным на стварэнне і падтрыманне зручнага, бяспечнага, сучаснага і эстэтычна арганізаванага асяроддзя жыццядзейнасці людзей у раёне, удзяляецца асаблівая ўвага. За бягучы перыяд 2025 года праведзены комплексныя работы па добраўпарадкаванні сквера насупраць дзяржаўнай лесагаспадарчай установы «Любанскі лясгас». Тут устаноўлены вулічныя ліхтары, перакладзены тратуарныя дарожкі, заменены і ўстаноўлены сучасныя лаўкі, а таксама пабудаваны фантан. Усё гэта накіравана на стварэнне бяспекі, камфорту і якаснага адпачынку жыхароў горада. Абноўлены сквер — значны ўнёсак у развіццё гарадской інфраструктуры. Грунтоўныя работы праведзены таксама па добраўпарадкаванні аб’екта «Мемарыяльны комплекс «Камсамольцам і моладзі Любаншчыны» і помніка Ф. Г. Конанавай. Устаноўлена дэкаратыўнае асвятленне, уладкаваны тратуарныя дарожкі і абноўлена канструкцыя комплексу.
На гарадской тэрыторыі таксама праведзены капітальны рамонт двух шматкватэрных жылых дамоў. У цяперашні час вядуцца будаўніча-мантажныя работы будынка інтэрната, размешчанага ў Любані. Таксама ўзводзяцца аб’екты «Будаўніцтва сетак ліўневай каналізацыі ў г. Любань», 1-я чарга (1-ы, 2-і, 3-і і 4-ы пускавыя комплексы), а таксама аб’екта «Добраўпарадкаванне з устройствам ліўневых каналізацый у мікрараёне (вул. Леніна, Савецкая, Янкі Купалы і завулак Пралетарскі) у г. Любань Мінскай вобласці, уключаючы праектна-даведачныя работы».
Завершаны работы па добраўпарадкаванні цэнтральнай часткі горада, мемарыяльнага комплексу «Востраў Зыслаў» і брацкай магілы ахвяр генацыду. Вядзецца добраўпарадкаванне гарадскога пасёлка Урэчча перад правядзеннем раённага свята «Дажынкі-2025». Тут запланавана добраўпарадкаваць зону адпачынку, паркоўку, а таксама зрабіць рамонт фасаду будынкаў. Цяпер вядуцца рэканструкцыя і добраўпарадкаванне парку культуры і адпачынку ў Любані.
Чысты, утульны і дагледжаны, Любанскі раён уражвае прыгажосцю. Мы заўсёды шчыра сустракаем гасцей і імкнёмся зрабіць усё магчымае, каб наш край у кожнага пакінуў самыя прыемныя ўражанні.
Святлана СІЛЬВАНОВІЧ
