Якія навацыі чакаюць абітурыентаў пры здачы цэнтралізаваных тэсціравання і экзамену ў гэтым годзе, у час выязнога пасяджэння Пастаяннай камісіі па адукацыі, навуцы, культуры і сацыяльным развіцці Савета Рэспублікі «Уступная кампанія — 2026: празрыстасць, аб’ектыўнасць, давер» расказала старшыня камітэта па адукацыі Мінгарвыканкама Марына Ільіна, перадае БелТА.
«Усе новаўвядзенні (якія датычацца ўступнай кампаніі. — Заўв. БелТА) накіраваны на тое, каб забяспечыць празрыстасць, справядлівасць і каб кожны выпускнік разумеў шлях паступлення ў вышэйшыя навучальныя ўстановы. Навацый не так шмат у гэтым годзе. Сярод іх тое, што пры запаўненні бланка адказаў цяпер пазначаецца ідэнтыфікацыйны нумар, а раней — нумар пашпарта. На мой погляд, гэта новаўвядзенне вельмі зручнае, таму што бывае, напрыклад, замена пашпарта, калі мяняецца і яго нумар, а ідэнтыфікацыйны даецца на ўсё жыццё», — адзначыла Марына Ільіна. Яна дадала, што гэта дае магчымасць пазбегнуць блытаніны пры атрыманні рэзультатаў ЦТ і ЦЭ.
З гэтага года таксама афіцыйна ў дакументах замацавана забарона на вынас інфармацыі аб ходзе тэсціравання або экзамену на любых носьбітах. «Гэта і раней было забаронена — пра гэта гаварылі, расказвалі абітурыентам. Але ўсё роўна былі моманты, калі, напрыклад, на руцэ запісвалі. А на сённяшні дзень дакладна прапісана, што на любых носьбітах выносіць інфармацыю аб ходзе тэсціравання нельга», — акцэнтавала ўвагу Марына Ільіна.
«Ёсць яшчэ адзін нюанс: мы абмеркавалі дакладныя параметры калькулятараў, якімі можна карыстацца пры здачы цэнтралізаванага экзамену і цэнтралізаванага тэсціравання», — дадала яна.
Паводле яе слоў, на сённяшнім пасяджэнні абмяркоўваецца гатоўнасць Рэспубліканскага інстытута кантролю ведаў да ўступнай і выпускной кампаній. «Мы разумеем, што за 30 гадоў работы РІКВ набыў дастатковы вопыт — яны сёння маюць базу, якая дае магчымасць рабіць не толькі якасны зрэз па ўзроўні ведаў, але і якасна правесці на высокім узроўні цэнтралізаваныя экзамен і тэсціраванне», — дадала старшыня камітэта.
Марына Ільіна падкрэсліла, што ў гэтым годзе ў сталіцы налічваецца прыкладна 12 тыс. выпускнікоў 11-х класаў, з якімі праводзіцца мэтанакіраваная работа па падрыхтоўцы да ЦТ і ЦЭ. «Калі яны праходзяць і рэпетыцыйны экзамен, яны разумеюць, у якіх аўдыторыях будуць здаваць, яны спрабуюць сябе і ў рэпетыцыйным тэсціраванні. Класныя кіраўнікі, настаўнікі на месцах праводзяць вялікую работу, каб мінімізаваць для іх стрэсавы фактар, — сказала яна. — Акрамя таго, усе заданні складзены ў рамках школьнай праграмы».
