Кіраўнік дзяржавы ў Мінскім міжнародным выставачным цэнтры азнаёміцца са стэндамі арганізацый — лаўрэатаў сімвалаў Дзяржаўнага знака якасці за 2025 год.
З ліку прамысловай прадукцыі знак якасці прысвоены легкавому аўтамабілю маркі BELGEE мадэлі Х50; збожжаўборачнаму самаходнаму камбайну GS12А1 вытворчасці «Гомсельмаша»; універсальнаму пагрузчыку AMKODOR W500C; машыне для ўнясення пылападобных хіммеліярантаў МШХ-9 вытворчасці «Бабруйскаграмаша»; дызельнаму рухавіку MMZ-3ld Мінскага маторнага завода.

Таксама гэтай высокай ацэнкі ўдастоены кабелі з ізаляцыяй са сшытага поліэтылену 6-330 кВ вытворчасці «Энергакамплекта»; садовыя арэлі «Александрыя» вытворчасці «Ольса»; напаўільняны змякчаны плед Аршанскага льнокамбіната.

Дзяржаўны знак якасці прысвоены і харчовым таварам. Гэта «Рулет „Мясны арэх з індычкі“ вытворчасці „Агракамбінат „Дзяржынскі“; марожанае пламбір з водарам ванілі ў вафельным кубачку „1962“ вытворчасці Кобрынскага масларобна-сыраробнага завода; малако неразведзенае згушчанае варанае з цукрам „Ягорка“ Рагачоўскага малочнакансервавага камбіната; малочны шакалад «Любімая Алёнка» вытворчасці «Камунаркі».

Указ аб заснаванні Дзяржаўнага знака якасці Прэзідэнт падпісаў у студзені 2024 года. Знак уяўляе сабой пяцівугольнік чырвонага колеру, у цэнтры якога размешчана стылізаваная выява перавернутай літары «К» і надпіс «Беларусь». Пяць вуглоў знака сімвалізуюць якасць беларускай прадукцыі, якая дасягаецца спалучэннем пяці паказчыкаў вытворчасці: бяспекі, экалагічнасці, інавацыйнасці, тэхналагічнасці і эстэтычнасці. Упершыню Дзяржаўныя знакі якасці Аляксандр Лукашэнка ўручыў год таму на ўрачыстай цырымоніі ў Палацы Незалежнасці.